ԵՄ արտաքին գործերի եւ անվտանգության քաղաքականության գերագույն ներկայացուցիչ Կայա Կալասը դատապարտել է վրացական ոստիկանության դաժան գործողությունները Tbilisi Mall-ում (մայրաքաղաք մուտքի/ելքի տարածք Արեւմտյան Վրաստանից), որը ցուցարարները ծրագրել էին արգելափակել փետրվարի 2-ին բողոքի ակցիայի ժամանակ, հայտնել է SOVA-ն։
Կալասն ընդգծել է Վրաստանի ՆԳՆ ներկայացուցիչների գործողությունների դաժանությունը եւ նշել, որ Վրաստանը «չի արդարացնում ԵՄ թեկնածու երկրի ակնկալիքները»։
Քաղաքական գործիչն ընդգծել է, որ Եվրամիությունը կանգնած է վրացի ժողովրդի կողքին ազատության եւ ժողովրդավարության համար նրա պայքարում։
«Այսօր երեկոյան (փետրվարի 2-ին - խմբ.) Թբիլիսիում տեղի ունեցած խաղաղ ցույցերի մասնակիցների, լրագրողների եւ քաղաքական գործիչների դաժան ճնշումը անընդունելի է։ Վրաստանը չի արդարացնում թեկնածու երկրի ակնկալիքները. ԵՄ-ը աջակցում է Վրաստանի ժողովրդին ազատության եւ ժողովրդավարության համար նրա պայքարում»,- գրել է եվրոպացի քաղաքական գործիչը։
Հիշեցնենք, որ Թբիլիսիի մուտքի՝ Tbilisi Mall առեւտրի կենտրոնի մոտ տեղի ունեցած բողոքի ակցիայի ժամանակ ֆիզիկական բախում է տեղի ունեցել ուժայինների եւ ցուցարարների միջեւ։ Նախնական տվյալներով՝ իրավապահները ուժի կիրառմամբ բերման են ենթարկել բողոքի ակցիայի մոտ 30 մասնակիցների։
Ձերբակալվածների թվում են «Հանուն փոփոխությունների կոալիցիայի» անդամներ Նիկա Մելիան եւ Թենգո Թեւզաձեն, Թբիլիսիի նախկին քաղաքապետ Գիգի Ուգուլավան, ակտիվիստ Դմիտրի Բիձինաշվիլին։ Առայժմ պարզված չէ՝ նրանք վարչական կարգով բերման են ենթարկվել ոստիկաններին չենթարկվելո՞ւ, թե՞ քրեական ճանապարհով մայրուղի փակելու համար։
Ավելի ուշ հայտնի է դարձել, որ քաղաքական գործիչ Նիկա Մելիան ձերբակալվել է վարչական մեղադրանքով, եւ որ նա արդեն ազատ է արձակվել ստորագրությամբ։
