Վարչապետ Իրակլի Կոբախիձեն հերթական անգամ մեղադրել է վրացական ընդդիմությանը և դրսից եկող որոշ ուժերի սադրանքներ նախապատրաստելու մեջ։ Այսպես է կառավարության ղեկավարը մեկնաբանում Պետական անվտանգության ծառայության հաղորդագրությունը, ըստ որի խորհրդարանական ընտրություններից առաջ քաղաքական շրջանակների հետ առնչվող որոշ խմբեր մտադիր են արհեստական բանականության և ժամանակակից այլ տեխնոլոգիաների կիրառմամբ կեղծ տեսագրություններ և ձայնագրություններ տարածել։ Նշված կեղծ տեսագրություններում օգտագործվելու են Վրաստանի կառավարության ներկայացուցիչների ձայներն ու տեսանյութերը, ըստ SOVA պորտալի՝ հայտնում է երկրի Պետական անվտանգության ծառայությունը։
«Խոսքը մեր երկրին բարիք չցանկացող քաղաքական ուժերի մասին է։ Դա վերաբերում է թե՛ երկրից դուրս, թե՛ երկրի ներսում գործող ուժերին, նկատի ունեմ արմատական ընդդիմությանը և նրանց օտարերկրյա հովանավորներին, թեև կարծում եմ, որ նման գործողությունները չեն կարող որևէ ազդեցություն ունենալ ընտրությունների արդյունքների վրա, բայց լավ է, որ մեր պետական կառույցները. մասնավորապես Պետական անվտանգության ծառայությունը զգոն է։
Անշուշտ, պետք է առանձնապես հոգ տանել, որ որևէ մեկը չկարողանա որևէ բացասական ազդեցություն ունենալ այս ընտրությունների վրա։ Ըստ այդմ, մենք, իհարկե, պետք է շնորհակալություն հայտնենք Պետական անվտանգության ծառայությանը՝ հանրությանը կարևոր տեղեկություն տրամադրելու համար»,- ընդգծել է Կոբախիձեն։