Վրաստանի հինգերորդ նախագահ Սալոմե Զուրաբիշվիլին, որին ընդդիմությունը եւ միջազգային գործընկերների մի մասը համարում են պետության գործող ղեկավար, լրագրողներին կհրավիրի նոր գրասենյակ Նոր տարուց հետո։ Այս մասին նա հայտնել է «Փիրվելի» հեռուստաընկերության կարճ մեկնաբանությունում։
Նախօրեին նա հեռացել էր Օրբելիանիի նախագահական պալատից եւ հայտնել, որ իր հետ կտանի «լեգիտիմությունը, դրոշը եւ քաղաքացիների վստահությունը»։
Զուրաբիշվիլին «անընդունելի է անվանել» Միխայիլ Կավելաշվիլու կողմից, որին նա համարում է ոչ լեգիտիմ նախագահ, նոր «ռեպրեսիվ» օրենքների ստորագրումը։ Դրանցից մեկը նախատեսում է պետական պահպանության չեղարկում Զուրաբիշվիլու համար, գրել է «Эхо Кавказа»-ն։
«Պետական պահպանության հատուկ ծառայության մասին» օրենքի փոփոխությունների համաձայն, որը նախաձեռնել է «Վրացական երազանքը», նախագահը, վարչապետը եւ խորհրդարանի նախագահը անձնական պահպանություն չեն ունենա իրենց լիազորությունների ավարտից հետո, եթե Սահմանադրական դատարանը, 48-րդ հոդվածի համաձայն, հաստատի նրանց կողմից Սահմանադրության խախտումը կամ իրենց գործողություններում հանցագործության նշանների առկայությունը։
Լրատվամիջոցը հիշեցրել է, որ դատարանը Սահմանադրության խախտում է համարել Զուրաբիշվիլու այցերը Եվրոպա՝ առանց կառավարության հետ համաձայնեցնելու, սակայն կառավարող «Վրացական երազանքը» չի կարողացել հաստատել նրա իմփիչմենթը ձայների անբավարարության պատճառով։
Այսօր, չնայած այն բանին, որ օրենքն արդեն մտել է ուժի մեջ, Զուրաբիշվիլուն դեռ պահպանում են Պետական պահպանության ծառայության աշխատակիցները, ընդգծել է «Эхо Кавказа»-ն։
