Սեպտեմբերի 15-ի երեկոյան Վարշավայի Ֆրեդերիկ Շոպենի անվան օդանավակայանում տերմինալի մի քանի գոտիներից տարհանել են ուղևորներին՝ առանց հսկողության թողնված ուղեբեռի մասին հաղորդումից հետո, հայտնում է TVN 24-ը։
Դեպքի վայր են ժամանել Լեհաստանի Սահմանապահ ծառայության ականազերծող մասնագետները, որոնք ստուգել են առարկան հնարավոր վտանգի առկայության համար։ Ավելի ուշ օդանավակայանը վերադարձել է բնականոն աշխատանքին։
Անտեր ուղեբեռի մասին հաղորդումը ոստիկանություն է ստացվել ժամը 19:00-ից քիչ առաջ։ Մայրաքաղաքի ոստիկանության ներկայացուցիչ Պավել Խմուրայի խոսքով՝ տարհանվել են մեկնման տերմինալներում գտնվող մարդիկ, ինչպես նաև A1 մուտքի մոտ գտնվող ժամանման գոտու ուղևորները։ Գործողության ընթացքում մեկնման գոտում ավտոմեքենաների երթևեկությունը նույնպես սահմանափակել են․ այնտեղ թույլատրվել է տեղաշարժվել միայն քաղաքային ավտոբուսներին։
Օդանավակայանի ներկայացուցիչ Պյոտր Ռուդսկին հաստատել է, որ տերմինալի մի մասը ստիպված են եղել տարհանել հենց առանց հսկողության թողնված ուղեբեռի պատճառով։ Թե քանի մարդ է սկզբում լքել շենքը, չի հաղորդվել։
Լեհական ռադիոյի տվյալներով՝ գործողության ընթացքում Սահմանապահ ծառայության ականազերծող մասնագետները ստուգել և վնասազերծել են թողնված ուղեբեռը։ Ծառայությունների աշխատանքի ավարտից հետո տերմինալները սկսել են վերադառնալ բնականոն ռեժիմի, իսկ ուղևորներին կրկին թույլատրվել է մտնել օդանավակայանի շենք։
Միջադեպը չի հանգեցրել օդանավակայանի աշխատանքի երկարատև դադարեցման։ Գործողության ավարտից հետո կոնկրետ չվերթների կատարման վերաբերյալ որոշումները կայացրել են ավիաընկերությունները։
