Ուրբաթ օրը Թբիլիսիում մեկ տասնյակից ավելի բողոքի ցույցեր են նախատեսված։ Ողջ օրվա ընթացքում Վրաստանի մայրաքաղաքի փողոցներով երթերը վարելու են բժիշկներ, երաժիշտներ, ֆինանսիստներ և այլ ոլորտների ներկայացուցիչներ։ Ակցիաների մասին հայտարարվել է Facebook սոցիալական ցանցում, հայտնում է Грузия On-line-ը։
Բողոքի ակցիաներ տեղի կունենան նաև Վրաստանի այլ քաղաքներում։ Առանձին արժե առանձնացնել Բաթումի նավաստիների հանրահավաքը։ Նրանք հավաքվում են ժամը 19:00-ին քաղաքի կենտրոնում՝ Եվրոպայի հրապարակում։
Ցուցարարների հիմնական պահանջները մնում են նոր խորհրդարանական ընտրությունները և նախկինում կալանավորված ցուցարարների ազատ արձակումը։
Վրաստանում արդեն 15-րդ օրն է, ինչ չեն հանդարտվում լայնամասշտաբ եվրոպամետ ցույցերը։ Քաղաքացիները դուրս են եկել փողոց՝ ի պատասխան Եվրամիությանն անդամակցելու բանակցությունները մինչև 2028 թվականը հետաձգելու իշխանությունների որոշման։
Վերջին երկու շաբաթվա ընթացքում Թբիլիսիում ավելի քան 400 մարդ է ձերբակալվել։ Նրանցից շուրջ երեք տասնյակը դատապարտվել են զանգվածային անկարգություններին մասնակցելու համար, հարուցվել են քրեական գործեր։
Թբիլիսիում բազմահազարանոց հակակառավարական ցույցերը բազմիցս ցրվել են հատուկ ջոկատայինների կողմից։ Ցուցարարների դեմ կիրառվել են արցունքաբեր գազ, ջրցան մեքենաներ և ռետինե փամփուշտներ։ Ոստիկանությունը քաոսային կերպով ձերբակալություններ է իրականացրել։ Իրավապաշտպաններն ասում են, որ անվտանգության ուժերը ծեծի են ենթարկել և ձերբակալել հիմնականում խաղաղ ցուցարարներին: Հանրային պաշտպանի տվյալներով՝ ձերբակալվածների մինչև 65%-ը հայտնել է ոստիկանության կողմից վատ վերաբերմունքի մասին։
