Կիևը 35 միլիարդ եվրոյի նոր վարկը, որը կմարվի ռուսական ակտիվներից օտարված միջոցների հաշվին, կստանա սոսկ ԵՄ նախնական քաղաքական պայմանների կատարման դեպքում, որոնք կամրագրվեն առանձին հուշագրով։
Այդ մասին հայտարարել է Արդարադատության հարցերով եվրահանձնակատար Դիդիե Ռեյնդերսը, որը Եվրահանձնաժողովում համակարգում է Ռուսաստանի Դաշնության սառեցված ակտիվների օտարման գործընթացը։
«Այդ մակրոֆինանսական վարկը կտրամադրվի Ուկրաինայի կողմից ԵՄ-ի հետ համաձայնեցված նախնական քաղաքական պայմանների կատարման հիման վրա, որոնք կամրագրվեն փոխըմբռնման առանձին հուշագրով», - ասել է Ռեյնդերսը՝ չհստակեցնելով Եվրահանձնաժողովի պահանջների բովանդակությունը։
Նա Եվրախորհրդարանին կոչ է արել ամենակարճ ժամկետներում համաձայնեցնել այդ մեխանիզմը: