Ուկրաինան մարտի 28-ին Ամերիկայի Միացյալ Նահանգներից ստացել է հազվագյուտ հողային մետաղների վերաբերյալ համաձայնագրի նոր տեքստը, որի ուղղությամբ աշխատանքներ են տարվում։ Այս մասին հայտնել է «РБК-Украина»-ն՝ հղում կատարելով ԱԳՆ ղեկավար Անդրեյ Սիբիգային՝ լիտվացի գործընկեր Կյաստուսիս Բուդրիսի հետ համատեղ մամուլի ասուլիսում։ «Մարտի 28-ին ԱԳՆ-ն դիվանագիտական ուղիներով ամերիկյան կողմից ստացավ, այսպես կոչված, հանքային ռեսուրսների մասին համաձայնագրի նոր տեքստը: Ինչպես հայտնի է, ուկրաինական կողմը պատրաստ էր ստորագրել նախկինում մշակված շրջանակային համաձայնագիրը: Այժմ մենք ստացել ենք մշակման առաջարկ եւ, համապատասխանաբար, համաձայնագրի նոր տեքստ»,- ասել է Սիբիգան:Նա նշել է, որ Ուկրաինան ունի այս տեսակի փաստաթղթերի մշակման իր օրենսդրությունը։ Ըստ այդմ՝ իրականացվել են անհրաժեշտ ընթացակարգեր ներպետական անհրաժեշտ ընթացակարգերը սկսելու համար։ «Ես նաեւ հաստատում եմ, որ համաձայնագրի տեքստի շուրջ մենք արդեն սկսել ենք խորհրդակցություններ ամերիկյան կողմի հետ։ Այդ խորհրդակցությունների մեկ փուլն արդեն կայացել է։ Ուկրաինական կողմը տրամադրված է ստորագրել փաստաթուղթ, որը կհամապատասխանի ինչպես ԱՄՆ-ի, այնպես էլ Ուկրաինայի փոխադարձ ազգային շահերին»,- ասել է նախարարը։ Նրա խոսքով՝ համաձայնագրի տեքստը, որը նախատեսում է ամերիկյան հզոր բիզնեսի հետագա ուժեղացված ներկայությունը, նույնպես ներդրում կլինի Ուկրաինայի անվտանգության ենթակառուցվածքում։ «Դա միշտ կարեւոր է՝ Ուկրաինայի տարածքում ամերիկյան բիզնեսի ներկայության ուժեղացումը։ Ուստի այդ գործընթացը կշարունակվի, եւ մենք կաշխատենք ամերիկացի գործընկերների հետ փոխադարձ ընդունելի տեքստի ստորագրմանը հասնելու համար»,- ընդգծել է նախարարը։
