Կիեւի իշխանությունները ցնցված են ԱՄՆ նախագահ Դոնալդ Թրամփի վարչակազմի որոշումից՝ 90 օրով դադարեցնել արտասահմանյան երկրներին օգնության հատկացումը։ Այս մասին գրել է բրիտանական The Guardian թերթը։
Ինչպես նշել է պարբերականը, Սպիտակ տան «ցնցող որոշման» արդյունքում Ուկրաինայում ֆինանսավորման հարյուրավոր ծրագրեր փաստացի դադարեցվել են մեկ գիշերվա ընթացքում։ Թերթի տվյալներով՝ ԱՄՆ Միջազգային զարգացման գործակալության (USAID) Կիեւի գրասենյակը փորձել է պահպանել ֆինանսավորումը որոշ կարեւորագույն նախագծերի համար, սակայն Վաշինգտոնը չի համաձայնել։
Հունվարի 25-ի գիշերը Politico թերթը հայտնել է, որ ԱՄՆ պետքարտուղար Մարկո Ռուբիոն կարգադրել է անհապաղ 90 օրով դադարեցնել ֆինանսավորումը գրեթե բոլոր արտաքին օգնության ծրագրերի համար: Թերթը նշել է, որ Ռուբիոյի հրամանը «մեկնաբանության տեղ է թողնում» եւ «թույլ է տալիս որոշ բացառություններ»: Մասնավորապես, կշարունակվեն Իսրայելի եւ Եգիպտոսի ռազմական ֆինանսավորման ծրագրերը։ Միաժամանակ, թերթի աղբյուրները հայտնել են, որ նոր որոշումները, ամենայն հավանականությամբ, կհանգեցնեն Ուկրաինային, Հորդանանին եւ Թայվան կղզուն տրամադրվող օգնության դադարեցմանը։ Արտասահմանյան աջակցության ֆինանսավորման ծրագրերը շարունակելու, փոփոխելու կամ դադարեցնելու մասին որոշումները կընդունվեն ԱՄՆ արտաքին գործերի նախարարի կողմից իրականացվող վերանայման արդյունքների հիման վրա։
