Անկարայում տեղակայված BMC-ի նոր գործարանում սկսվել է թուրքական Altay հիմնական մարտական տանկի (MBT) սերիական արտադրությունը: Ընկերության ներկայացուցիչները հայտնել են, որ գործարանի պաշտոնական բացման արարողության ժամանակ առաջին տանկերը կհանձնվեն զինվորականներին:
Պետական Anadolu լրատվական գործակալությունն առաջին անգամ ցուցադրել է Անկարայի ավիատիեզերական մասնագիտացված արդյունաբերական գոտում իրականացվող արտադրությունը, որտեղ «պողպատը վերածվում է Altay տանկերի»:
BMC-ի գործադիր տնօրեն Ֆուատ Թոսյալին հայտարարել է, որ Altay սերիական արտադրության մեկնարկը պատմական իրադարձություն է: «Մենք ուրախանում ենք մեր երկրի 100-ամյա երազանքի իրականացումից: Altay տանկի սերիական արտադրությունը սկսվել է: Շուտով մեծ արարողություն տեղի կունենա՝ բարձրագույն ղեկավարության մասնակցությամբ»,- ասել է նա:
Ռեկորդային ժամանակում կառուցված գերժամանակակից գործարանը հագեցած է առաջադեմ տեխնոլոգիաներով և միավորում է BMC Defense-ը տանկերի արտադրության համար և BMC Power-ը՝ տեղական BATU էլեկտրակայանի մշակման և արտադրության համար:
Ձեռնարկությունն օգտագործում է թուրքական արտադրության արդյունաբերական ռոբոտներ և նորագույն տեխնոլոգիաներ: Արտադրությունը ներառում է ամբողջական ցիկլը՝ հիմնակմախքի արտադրությունից մինչև վերջնական հավաքումը։
Ըստ Թոսյալիի՝ անցյալ տարի փորձարկման համար փոխանցված տանկերը հաջողությամբ հաստատել են բոլոր հայտարարված բնութագրերը։
Հատուկ ուշադրություն է դարձվում BATU շարժիչի մշակմանը. այն պետք է անցնի առնվազն 10 հազար կմ ճանապարհային փորձարկումներ և մի շարք հուսալիության թեստեր։
«Մինչ այժմ ուժամեքենայի ծրագիրն ընթանում է ըստ ժամանակացույցի, լուրջ խնդիրներ չկան։ Բոլոր տարրերը, դրանց թվում՝ ՀՕՊ համակարգերը, փորձարկվում են տանկի հետ միասին։ Այս սարքը համատեղում է աշխարհի ամենաժամանակակից տեխնոլոգիաները»,- նշել է BMC-ի ղեկավարը։
Ըստ Թոսյալիի՝ նոր գործարանը կդառնա թուրքական ցամաքային պաշտպանության արդյունաբերության հիմքը։ Գործարանը ոչ միայն Altay տանկեր, այլև նոր 8x8 ALTUG մարտական մեքենաներ կարտադրի, որոնց համար արդեն ստացվել են պատվերներ։
«Դա սոսկ գործարան չէ. դա ազգային պատասխանատվություն է և ազգային ոգեշնչում»,- ընդգծել է նա։
