Թուրքական հետախուզությունը հոկտեմբերի 23-ին Անկարայում տեղի ունեցած ահաբեկչությունից հետո ոչնչացրել է Քրդստանի բանվորական կուսակցության մոտ 120 օբյեկտ Իրաքում և Սիրիայում։ Այս մասին հաղորդում է TRT Haber հեռուստաալիքը՝ վկայակոչելով հետախուզական ծառայությունների աղբյուրներին։
Մանրամասներ դեռ չեն հաղորդվում։
Հոկտեմբերի 23-ին ահաբեկիչները հարձակվել են Անկարայում գտնվող Tusa ավիատիեզերական կորպորացիայի ձեռնարկություններից մեկի վրա։ Արդյունքում զոհվել է 5, վիրավորվել՝ 22 մարդ։ Երկու հարձակվողները սպանվել են:
Անվտանգության ծառայությունները պարզել են, որ հարձակվողները PKK-ի զինյալներ են։ Թուրքիայի նախագահ Ռեջեփ Թայիփ Էրդողանը հոկտեմբերի 24-ին Ստամբուլում անվտանգության հարցերով խորհրդակցություն է անցկացրել, որի ավարտին նշվել է, որ հանրապետական իշխանությունները կշարունակեն վճռականորեն պայքարել ահաբեկչության դեմ երկրում և արտերկրում։
