«Այս պահին ձկան որսը օրինականացնելու հարցը քննարկման փուլի մեջ է: Բնապահպանության նախարարության, Ազգային պարկի և Գեղարքունիքի մարզպետարանի հետ միասին փորձում ենք այս հարցին լուծում տալ: Իջևանցիների և ծովագյուղցիների պահանջները տարբեր են, մեր բնակիչները չեն պահանջում անօրինական կերպով ձուկ բռնել, հակառակը՝ ուզում են ձկնորսությունն օրիկնացնել: Այդպես ձուկը ոչ թե 100 դրամ կվաճառվի, այլ՝ 1000 դրամ, ձկնորսներն էլ համապատասխան հարկ կվճարեն»,- այս մասին Politik.am-ին ասաց Ծովագյուղի համայնքապետ Վահրամ Գևորգյանը՝ բացառելով այն տեղեկությունները, որ իրենց համայնքում կարող է կրկնվել Իջևանի օրինակը:
Հիշեցենք, որ մամուլի հրապարակումներից մեկի համաձայն՝ Իջևանի օրինակով բողոքի մի ալիք էլ հասունանում է Ծովագյուղում՝ ձկնորսությունն արգելելու հետ կապված.
«Ծովագյուղցիները իջևանյան զարգացումներից հետո նույնպես մտադիր են դիմել ծայրահեղ միջոցների՝ փակելով Մ4 միջպետական մայրուղին: Խնդիրն այն է, որ Ծովագյուղում էլ ձկնորսությունն է համարվում ապրուստի հիմնական միջոց, և հիմա տեղացիները կանգնելու են լրջագույն փաստի առաջ»,- ասված է հրապարակման մեջ:
Մեր հարցին, թե ձկնորսության հնարավոր օրինականացումը չի՞ կարող ռիսկային լինել Սևանին համար, համայնքապետը պատասխանեց՝ մինչև հիմա ռիսկային չի եղել, ձկնորսությունն օրինականացնելուց հետո՞ պետք է ռիսկային լինի:
