ԱՄՆ նախագահ Դոնալդ Թրամփի վարչակազմը մտադիր է եվրոպացի դաշնակիցներից պահանջել ավելացնել ամերիկյան զենքի գնումները՝ դրանք Ուկրաինային փոխանցելու համար։ Այս մասին երկուշաբթի հայտնել է Reuters-ը։ Նրա աղբյուրների համաձայն՝ «Թրամփի վարչակազմը նախատեսում է եվրոպացի դաշնակիցներին մղել Մոսկվայի հետ հնարավոր խաղաղ բանակցություններից առաջ ավելացնել ամերիկյան զենքի գնումներն Ուկրաինայի համար»։ Ինչպես նշվել է հրապարակման մեջ, Ռուսաստանի Դաշնության եւ Ուկրաինայի հարցերով Թրամփի հատուկ բանագնաց Քիտ Քելոգը մտադիր է այս ծրագիրը քննարկել եվրոպացիների հետ Մյունխենի անվտանգության համաժողովի շրջանակում, որը տեղի կունենա փետրվարի 14-16 -ին։ Գործակալությունը հիշեցրել է, որ ԱՄՆ նախկին նախագահ Ջո Բայդենի վարչակազմի օրոք եվրոպական երկրներն ամերիկյան զենք էին գնում Ուկրաինայի համար։Գործակալության հարցազրույցում Քելոգը չի հաստատել այս պլանի առկայությունը։ Նա նաեւ ընդգծել է. «Միացյալ Նահանգները միշտ ցանկանում է վաճառել ամերիկյան արտադրության զենք, քանի որ դա ուժեղացնում է մեր տնտեսությունը»։ «Տարբերակները շատ են։ «Այժմ ամեն ինչ դիտարկվում է»,- ավելացրել է նա։ Հատուկ բանագնացը նշել է, որ զենքերը շարունակում են մատակարարվել Ուկրաինա, ինչը եղել է Բայդենի օրոք։Հրապարակման մեջ նշվել է, որ Թրամփի վարչակազմը դիտարկում է մի քանի հնարավորություններ՝ ուղղված Կիեւին ամերիկյան զենքի մատակարարումը շարունակելուն, «առանց ամերիկյան միջոցների զգալի ծախսերի»։ Գործակալության տվյալներով, դեռ պարզ չէ՝ արդյոք ԱՄՆ իշխանությունները ցանկանում են, որ եվրոպական երկրներն ամերիկյան զենք գնեն անմիջապես Պենտագոնի պահեստներից, թե կոմերցիոն պայմանագրերի միջոցով։ Երկրորդ դեպքում որոշ գործարքներ փակելու համար կարող են տարիներ պահանջվել, ընդգծվել է հրապարական մեջ։
