ԱՄՆ նախագահ Դոնալդ Թրամփը հայտնել է, որ ավելի քան 100 երկրներ, այդ թվում՝ Հնդկաստանը, Ճապոնիան եւ Կորեայի Հանրապետությունը, քննարկում են Միացյալ Նահանգների հետ առեւտրային գործարքները։ Այս թվերը նա հնչեցրել է չորեքշաբթի NewsNation հեռուստաալիքի եթերում։
«Արդեն հիմա հարյուրից ավելի երկրներ մեզ զանգահարում են առավոտ, կեսօրին եւ գիշերը՝ հույս ունենալով գործարք կնքել»,- ասել է ԱՄՆ առաջնորդը։ Միեւնույն ժամանակ, նրա խոսքով, այն պետությունները, որոնք այս փուլում չեն ձգտում ԱՄՆ-ի հետ առեւտրային համաձայնագիր կնքել, «պետք է վճարեն 30-40-50-60 տոկոսի չափով [տուրքեր]»։ Այսպիսով, Թրամփի խոսքով՝ նա ակնկալում է փաստացի «ստեղծել այդ գործարքները»:
«Բայց մենք բանակցություններ ենք վարում Հարավային Կորեայի հետ, մենք բանակցություններ ենք վարում Ճապոնիայի եւ շատ այլ երկրների հետ»,- շարունակել է Թրամփը։ Նրա խոսքով՝ Հնդկաստանը «շահագրգռված չէր, որպեսզի որեւէ մեկի հետ բանակցություններ վարի»։ «Նրանք օգտվում էին մեզանից։ Բայց հիմա նրանք զանգահարում եւ ասում են. «Եկեք, խնդրեմ, գործարք կնքենք»,- ամփոփել է Թրամփը։
