Միացյալ Նահանգները պատրաստ է միլիարդավոր դոլարներ ներդնել Գրենլանդիայում նոր աշխատատեղեր ստեղծելու և նրա բարգավաճումը բարելավելու համար։ Այս մասին ԱՄՆ նախագահ Դոնալդ Թրամփը հայտարարել է Truth Social-ում։
«Ինչպես ես պարզ դարձրի Կոնգրեսի համատեղ նիստում իմ ելույթում, Միացյալ Նահանգները վճռականորեն աջակցում է Գրենլանդիայի ժողովրդի՝ սեփական ապագան որոշելու իրավունքին: Մենք կշարունակենք ձեզ անվտանգ պահել, ինչպես արել ենք Երկրորդ համաշխարհային պատերազմից հետո: Մենք պատրաստ ենք միլիարդավոր դոլարներ ներդնել՝ նոր աշխատատեղեր ստեղծելու և ձեզ հարստացնելու համար, և եթե ընտրեք, մենք ձեզ հրավիրում ենք դառնալ աշխարհի ամենամեծ երկրի՝ Ամերիկայի Միացյալ Նահանգների մի մասը»։ - գրել է պետության ղեկավարը։
Թրամփը նախկինում մի քանի անգամ ասել է, որ Գրենլանդիան պետք է միանա Միացյալ Նահանգներին։ Նա սպառնացել է բարձր առևտրային տուրքեր սահմանել Դանիայի վրա, եթե այն չհրաժարվի կղզուց։ Նույնիսկ իր առաջին նախագահական ժամկետում Թրամփն առաջարկել էր գնել Գրենլանդիան։ Ինչպես և այն ժամանակ, Դանիայի և Գրենլանդիայի իշխանությունները մերժել են այդ գաղափարը։
Գրենլանդիան Դանիայի կազմում է որպես ինքնավար տարածք։ 1951 թվականին Վաշինգտոնը և Կոպենհագենը, ի լրումն ՆԱՏՕ-ի դաշինքի պարտավորությունների, ստորագրել են Գրենլանդիայի պաշտպանության պայմանագիրը։ Դրան համապատասխան՝ ԱՄՆ-ն ստանձնել է կղզին ագրեսիայից պաշտպանելու պարտավորությունը։ Այնտեղ է գտնվում ամերիկյան Pituffik տիեզերական բազան, որն իրականացնում է հրթիռային հարձակման նախազգուշացման համակարգի և Արկտիկայի գոտու վերահսկման խնդիրները:
