ԱՄՆ նախագահ դիտարկում է արտերկրում մոտ 30 դեսպանատներ եւ հյուպատոսություններ փակելու հարցը՝ արտերկրում դիվանագիտական ներկայության էական փոփոխությունների ֆոնին, նշվել է պետդեպարտամենտի ներքին փաստաթղթում, որը հայտնվել է CNN-ի տրամադրության տակ։ Փաստաթղթում նաեւ առաջարկվում է կրճատել ԱՄՆ դիվանագիտական առաքելությունների քանակը Սոմալիում եւ Իրաքում, երկու երկրներ, որոնք առանցքային դեր են խաղում ԱՄՆ հակաահաբեկչական ջանքերում, եւ «վերափոխել» դիվանագիտական այլ ներկայացուցչությունները: Առաջարկվող փոփոխությունները տեղի են ունենում ԱՄՆ դիվանագիտականկառույցի սպասվող ավելի լայն փոփոխությունների ֆոնին, քանի որ Թրամփի վարչակազմը, որը խթանվում է Իլոն Մասկի կողմից աջակցվող կառավարության արդյունավետության դեպարտամենտի (DOGE) կողմից, լայնածավալ ջանքեր է գործադրում դաշնային կառավարությունը կրճատելու համար: Հայտնի չէ, թե արդյոք պետքարտուղար Մարկո Ռուբիոն ստորագրել է առաջարկները: Փաստաթղթով առաջարկվում է փակել 10 դեսպանատուն եւ 17 հյուպատոսություն։ Դրանցից շատերը գտնվում են Եվրոպայում եւ Աֆրիկայում, բայց կան նաեւ Ասիայում եւ Կարիբյան ավազանում: Դրանք ներառում են դեսպանատներ Մալթայում, Լյուքսեմբուրգում, Լեսոտոյում, Կոնգոյի Հանրապետությունում, Կենտրոնական Աֆրիկյան Հանրապետությունում եւ Հարավային Սուդանում: Ցուցակում ներառվել են նաեւ հինգ հյուպատոսություններ Ֆրանսիայում, երկուսը՝ Գերմանիայում, երկուսը՝ Բոսնիա եւ Հերցեգովինայում, մեկը՝ Մեծ Բրիտանիայում, մեկը՝ Հարավային Աֆրիկայում եւ մեկը՝ Հարավային Կորեայում։ Փաստաթղթում առաջարկվում է, որ փակվող դեսպանատների պարտականությունները կատարեն հարեւան երկրներում գտնվող ֆորպոստերը։
