Եմենում ԱՄՆ գործողության վերաբերյալ հետախուզական տեղեկատվության մի մասը, որը քննարկվել է Signal մեսենջերում զրուցարանում, Վաշինգտոնին է տրամադրել Իսրայելը, գրել է The Wall Street Journal թերթը (WSJ)՝ հղում կատարելով ամերիկյան վարչակազմի անանուն ներկայացուցիչներին։ Նրա տեղեկացմամբ՝ իսրայելական տեղեկատվությունը ստացվել է Եմենի իրենց աղբյուրից եւ վերաբերում է ապստամբական «Անսար Ալլահ» շարժման առաջնորդներից մեկի գտնվելու վայրին։ Իսրայելը մասնավոր կերպով իր դժգոհությունն է հայտնել ԱՄՆ-ից, որ իսրայելական հետախուզական տվյալները դարձել են հանրության սեփականությունը։Մարտի 24-ին The Atlantic ամսագրի գլխավոր խմբագիր Ջեֆրի Գոլդբերգը հոդված է հրապարակել, որում տեղեկացվել է, որ մարտի 11-ին նա հարցում է ստացել Signal մեսենջերին միանալու հարցում Մայք Ուոլթց մականունով մեկից (Ամերիկայի նախագահի ազգային անվտանգության գծով օգնականի անունը): Երկու օր անց լրագրողը ծանուցում է ստացել, որ իրեն ընդգրկել են խմբակային չաթում, որտեղ ԱՄՆ վարչակազմի անդամները քննարկել են Եմենին հարվածներ հասցնելը։ Լրագրողի խոսքով՝ մարտի 15-ին Փիտ Հեգսեթ մականունով օգտատերը (ԱՄՆ պաշտպանության նախարարի անունը) հաղորդագրություն է հրապարակել, որը պարունակում է Եմենում հութիների դեմ առաջիկա հարվածների մանրամասները՝ ներառյալ թիրախները, զենքերը եւ հարվածների մեկնարկի սպասվող ժամանակը, որը, ըստ Գոլդբերգի, համընկել է սոցիալական ցանցում առաջին ռմբակոծությունների հրապարակման ժամանակին: ԱՄՆ նախագահ Դոնալդ Թրամփը հայտնել է, որ նշված խումբը գաղտնի տվյալներ չի հրապարակել։ Նա ասել է, որ վստահում է իր ազգային անվտանգության թիմի բոլոր անդամներին, ներառյալ Ուոլթցին, չնայած տվյալների խախտման սկանդալին: Ուոլթցն ասել է, որ չգիտի, թե ինչու է Գոլդբերգը ներառվել փակ խմբում։
