2025 թվականի առաջին երեք ամիսների ընթացքում ՆԱՏՕ-ի անդամ երկրներն Ուկրաինային ավելի քան 20 միլիարդ դոլարի ռազմական օգնություն են տրամադրել։ Այս մասին հայտարարել է ՆԱՏՕ-ի գլխավոր քարտուղար Մարկ Ռյուտեն՝ ապրիլի 3-ին Բրյուսելում արտգործնախարարների մակարդակով Հյուսիսատլանտյան խորհրդի նիստի մեկնարկից առաջ ԱՄՆ պետքարտուղար Մարկո Ռուբիոյի հետ լրատվամիջոցներին մոտեցման ժամանակ։
ՆԱՏՕ-ի գլխավոր քարտուղարը հիշեցրել է, որ դաշինքի դաշնակից երկրներն այս տարվա առաջին երեք ամիսներին Ուկրաինային տրամադրել են ավելի քան 20 միլիարդ դոլար։
«Մենք տեսել ենք վերջին թվերը, որոնք ցույց են տալիս, որ ընդամենը առաջին երեք ամիսների ընթացքում ՆԱՏՕ-ի դաշնակիցները Ուկրաինային տրամադրել են ավելի քան 20 միլիարդ դոլար աջակցություն՝ ապահովելու համար, որ նա կարող է շարունակել պայքարը», - ասել է Ռյուտեն:
