Ռոնալդ Խոստիկյանը արդեն երրորդ օրն է, ինչ կառավարության մոտ ջրադուլ է հայտարարել: Պայքարում է երկվորյակ եղբայրների համար, ովքեր նրա խոսքով՝ 12 տարի ազատազրկման են դատապարտվել շինծու մեղադրանքներով: Խոստիկյանի պահանջը մեկն է՝ գործի հետքննություն:
«Եղբայրներս գողություն կատարելու մեղադրանքով Վանաձորում կալանավորված են արդեն 5 տարի: Բանն այն է, որ ավտոմասեր էին գնել առանց իմանալու, որ դրանք գողացված են:
Քննիչը իմացել է, որ մենք հնարավոր է գումար ունենանք, և օգտվելով առիթից, որ եղբայրներս նախկինում դատապարտված են եղել, գործ է սարքել»,- ասում է Խոստիկյանը:
Գործի վերանայման պահանջով դիմել է համապատսխան մարմիններին, արդյունքի չի հասել.
«Անցյալ տարի էլ եկա այստեղ, ջրադուլ սկսեցի: Վարչապետի օգնական Նաիրի Սարգսյանն եկավ, ասաց, որ գնամ վարչություն, դիմեմ՝ գործը նորից կքննեն: Դիմում գրեցի, խոստացան՝ ամեն ինչ լավ կլինի, գործը կվերանայեն, բայց խաբեցին: Գործը օդի մեջ մնաց, սահմանափակվեցին միայն ցուցմունքս վերցնելով»,- ասում է նա:
