ՀՀ ՆԳՆ ոստիկանության պետական պահպանության գլխավոր վարչության ծառայության վարչության շնավարժության բաժինը համապատասխան ծառայողական շներով համալրելու կապակցությամբ ստացել է քաղաքացու դիմում, որով վերջինս ցանկություն է հայտնել իրեն պատկանող բելգիական հովվաշուն ցեղատեսակի (մալինուա) շները նվիրել ՀՀ ներքին գործերի նախարարությանը (ընդհանուր 4 շուն)։ Այս հարցը ներառված էր կառավարության այսօրվա՝ ապրիլի 3-ի նիստում։
Ըստ ուսումնասիրությունների՝ վերը նշված շները պիտանի են վարժեցման և ծառայողական նպատակներով օգտագործման համար, չունեն առողջական խնդիրներ։
Ըստ ՆԳՆ-ի՝ բաժնում առկա են 21 ծառայողական շներ, որոնցից 13-ը ընդգրկված են զենք-զինամթերքի, պայթուցիկ նյութերի հայտնաբերման, 2-ը՝ հետախուզական, 5-ը՝ թմրանյութերի հայտնաբերման աշխատանքներում, իսկ 1–ը՝ մայրացու։
Նշվում է, որ ծառայողական շների առկա թվաքանակը բավարար չէ ծառայության պատշաճ կազմակերպումը մշտապես ապահովելու համար և հաճախ առաջացնում է խնդիրներ։ Առկա խնդիրների հաղթահարման նպատակով՝ անհրաժեշտություն է առաջացել ավելացնել ծառայողական շների թվաքանակը։
