Չինաստանի նախագահ Սի Ծինփիը հայտարարել է, որ իր հանդիպումը Ռուսաստանի նախագահ Վլադիմիր Պուտինի հետ էլ ավելի շատ կենսական ուժ կհաղորդի ռուս-չինական հարաբերություններին։
Կողմերը բանակցություններ են վարել փետրվարի 4-ին Պեկինում՝ 2022 թվականի ձմեռային օլիմպիական խաղերի բացման արարողությունից առաջ, հաղորդում է ChinaDaily-ն։
Հանդիպման ընթացքում Չինաստանի նախագահը հիշեցրել է իր ներկայության մասին 2014 թվականին Ռուսաստանում Սոչիի ձմեռային օլիմպիական խաղերի բացման արարողությանը, երբ նրանք պայմանավորվել են կրկին հանդիպել ութ տարի անց Պեկինում։
Սի Ծինփին իր պատրաստակամությունն է հայտնել աշխատել Պուտինի եւ ամբողջ աշխարհից ընկերների հետ՝ օլիմպիական ոգին առաջ մղելու համար։
Նախագահը հավելել է, որ պատրաստ է աշխատել Պուտինի հետ եւ նպաստել, որպեսզի Չինաստանի եւ Ռուսաստանի միջեւ բարձր մակարդակի վրա հիմնված փոխադարձ վստահությունը վերածվի բոլոր ոլորտներում համագործակցության արդյունքների, եւ իրական օգուտ բերել երկու երկրների ժողովուրդներին։
