ԱՄՆ վարչակազմը կարծում է, որ Հյուսիսային Կորեայի հրթիռների արձակումը սպառնում է ոչ միայն տարածաշրջանում, այլեւ ողջ աշխարհում խաղաղությանը և կայունությանը: Այս մասին ՏԱՍՍ-ի թղթակցին հայտնել են Պետդեպում։
«Միացյալ Նահանգները դատապարտում է ԿԺԴՀ-ի կողմից նոյեմբերի 4-ին (Վաշինգտոնի ժամանակով) բազմաթիվ բալիստիկ հրթիռների արձակումը: Այս արձակումները, ինչպես և անցյալ շաբաթվա միջմայրցամաքային բալիստիկ հրթիռի գործարկումը, խախտում են ՄԱԿ-ի Անվտանգության խորհրդի բազմաթիվ բանաձևեր: Դրանք վտանգ են ներկայացնում տարածաշրջանային և միջազգային խաղաղության և անվտանգության համար և խաթարում են զենքի չտարածման գլոբալ ռեժիմը»,- ասել է ամերիկացի դիվանագետը՝ պատասխանելով Փհենյանի արձակումները մեկնաբանելու խնդրանքին:
«Մենք շարունակում ենք սերտորեն խորհրդակցել մեր դաշնակիցների և գործընկերների հետ, թե ինչպես լավագույնս զսպել Հյուսիսային Կորեայի ագրեսիան և համակարգել միջազգային արձագանքը Հյուսիսային Կորեայի կողմից ՄԱԿ-ի Անվտանգության խորհրդի բազմաթիվ բանաձևերի խախտմանը: Կորեայի Հանրապետության և Ճապոնիայի պաշտպանությանը մեր հանձնառությունն անսասան է»,- եզրափակել է ամերիկյան արտաքին քաղաքականության գերատեսչության ներկայացուցիչը։
Ճապոնիայի պաշտպանության նախարար Գեն Նակատանիի խոսքով՝ Հյուսիսային Կորեան երեքշաբթի առավոտյան 7 փոքր հեռահարության բալիստիկ հրթիռ է արձակել։ Նրանք ընկել են Ճապոնիայի բացառիկ տնտեսական գոտուց դուրս։ Տոկիոն դիվանագիտական ուղիներով բողոք է հայտնել Փհենյանի դեմ։
