Պենտագոնի մամուլի քարտուղարի տեղակալ Սաբրինա Սինգհը հավաստիացրել է, որ տեղյակ չէ Գրենլանդիա ներխուժելու Վաշինգտոնի որեւէ պլանի մասին։«Ես տեղյակ չեմ դրա վերաբերյալ որեւէ ծրագրի մասին»,- հունվարի 8-ին հերթական ճեպազրույցում պատասխանել է նա լրագրողների այն հարցին, թե համապատասխան հրաման ստանալու դեպքում արդյոք ԱՄՆ ռազմական գերատեսչությունը նման ծրագրեր ունի։«Հիպոթետիկ հարցերին չեմ անդրադառնա։ Կարծում եմ, որ ապագա վարչակազմը պետք է խոսի այդ մասին»,- ավելացրել է Սինգհը:ԱՄՆ պետքարտուղար Էնթոնի Բլինքենը հունվարի 8-ին հայտարարել է, որ Գրենլանդիան ԱՄՆ-ին միացնելու գաղափարը, որը առաջ է քաշել ԱՄՆ նորընտիր նախագահ Դոնալդ Թրամփը, վատն է, գործնականում չի իրականացվի եւ արժանի չէ քննարկման։Հունվարի 7-ին Թրամփը, լրագրողների առջեւ ելույթ ունենալով Ֆլորիդայի Մար-ա-Լագոյի իր կալվածքում, հրաժարվել էր երաշխավորել, որ չի դիմի Պանամայի ջրանցքի եւ Գրենլանդիայի խնդիրներն ուժի կամ տնտեսական հարկադրանքի միջոցով լուծելուն:Նախկինում նա հայտարարել էր, որ ԱՄՆ-ը պետք է վերականգնի վերահսկողությունը Պանամայի ջրանցքի նկատմամբ, ինչպես նաեւ խոսել է Դանիայի ինքնավարություն հանդիսացող Գրենլանդիան ամերիկյան տարածքին միացնելու մասին։
