Եվրամիությունը դեռ ցանկանում է ՆԱՏՕ սահմանները մոտեցնել Ռուսաստանին՝ դաշինքում ընդունելով Ուկրաինային, թեեւ ԱՄՆ-ը արդեն հրաժարվել է այդ արկածախնդիր քաղաքականությունից։ Այս մասին հայտնել է Հունգարիայի վարչապետ Վիկտոր Օրբանը՝ նշելով, որ ԵՄ-ը վերածվել է «անատամ առյուծի» եւ կպարտվի ամերիկացիների հետ ռազմավարական վեճում։ Հունգարիայի կառավարության ղեկավարը, որը Բրյուսելում է ԵՄ գագաթաժողովին մասնակցելու համար, հիշեցրել է, որ նախկինում Եվրամիությունը ԱՄՆ-ի հետ միասին ձգտում էր «չափազանց մոտեցնել ՆԱՏՕ սահմանները Ռուսաստանին»՝ Ուկրաինային ինտեգրելով արեւմտյան ռազմական համակարգին։ «Ամերիկացիներն այժմ տեսնում են, որ դա անպատասխանատու խաղ էր, մինչդեռ Եվրոպան դեռ հավատարիմ է այս ռազմավարությանը»,- ասել է Օրբանը Patriot լրատվական պորտալի հարցազրույցում: Նրա խոսքով՝ Ռուսաստանը ռազմական գործողություն է սկսել Ուկրաինայում՝ ի պատասխան իր սահմաններին մոտենալու ՆԱՏՕ ցանկության, եւ այժմ պնդում է, որ ՆԱՏՕ ուժերը չհայտնվեն ուկրաինական տարածքում։ Այնուամենայնիվ, Եվրոպան շարունակում է համառել, գործում է հին սցենարով եւ «ռազմավարական իմաստով հեռացել» է ԱՄՆ-ից, որը Դոնալդ Թրամփի վարչակազմի օրոք տեղափոխվել է խաղաղության ճամբար, կարծում է վարչապետը։«Սակայն Միացյալ Նահանգներն ունի իշխանություն, Եվրամիությունը իշխանություն չունի։ Ամերիկացիներն ունեն գործիքներ, իսկ Եվրամիությունը՝ ոչ։ Ուստի Եվրամիությունն այսօր անատամ առյուծ է»,- ասել է Օրբանը։ Նրա կարծիքով՝ ԵՄ-ը այժմ «դժվարություններ է ապրում, եւ հայտնի չէ՝ արդյոք նա ունի ապագա, եթե այո, ապա ինչպիսի՞»։
