Նիկոլ Փաշինյանը նոր էր ընտրվել, երկու օրը մեկ լայվ էր մտնում ասում՝ ժողովուրդ ջան, գրկում, համբուրում եմ ձեզ, բա այդ օրենքն ընդունելուց մի հատ խորհդակցեիք ժողովրդի հետ: Այս մասին լրագրողների հետ զրույցում կառավարության դիմաց ասաց բողոքի ակցիայի մասնակիցներից մեկը: Նշենք, որ տնտեսվարողներն ակցիա են իրականացնում կառավարության առջև՝ դժգոհում են հարկերի բարձրացումից:
«Մեզ արհամարհում են, չեն պատասխանում մեր բողոքներին, այն անգամ հավաքվեցինք մտանք, ոչ մեկ աշխատակազմից չեկավ, ասացին՝ նամակ գրեք, մենք կփոխանցենք: Մի անգամ միայն հանդիպել են մասնագետները, ասացին՝ սա բարդ հարց է, կհետաձգենք 26 թվին: Նոր տարուց առաջ Փաշինյանն Աշտարակում հանդիպում է ունեցել, հետո ասացին՝ հունվարի մեկից է օրենքը»,-ասաց նա:
Նրա խոսքով՝ նշանակում է հեղինակը հենց Նիկոլ Փաշինյանն է: Իսկ թե ինչ փոխզիջման են պատրաստ գնալ նրանք, նա ասաց. «Փոխզիջումը հետևյալն է՝ այդ 10 տոկոսը վերանայեն, դա շատ-շատ է, հետո այդ թղթաբանությունը՝ մանավանդ օգտագործած ապրանքներինը չես կարող թուղթ տալ, չկա նման բան: Ոնց որ շտրաֆի մատերիալ դարձնեն, հարկայինը գա ու տուգանի, ոնց կլինի՞»,- ասաց նա:
Նրա խոսքով՝ 90 տոկոսը դժգոհ է: «Ովքեր ապրանք ներկրող են, փաստաթղթով աշխատում են, բայց մեծ մասն օգտագործած ապրանք է վաճառում Գնունու շուկայում առանց փաստաթղթի, մարդը եթե 3-4 հազարի առևտուր է անում, դա իր համար լավ է, հիմա դա չի թողնում Նիկոլ Փաշինյանը»,- ասաց նա:
Դիտարկմանը՝ նրանց շարքերում մարդիկ կան, որ ասում են իշխանությունը մեղք չունի, ակցիայի մասնակիցն ասաց. «Հենց իշխանությունն է մեղավոր, հենց Նիկոլ Փաշինյանն է մեղավոր, բա ո՞վ է հրամանները տալիս»:
