Ինչպես լրագրողների հետ զրույցում հակտնել է կուսակցության գործադիր մարմնի անդամ Բաբկեն Հարությունյանը, ներկայում ձերբակալված են կուսակցության երկու ներկայացուցիչներ, երկու տասնյակ ձերբակալվածների մասին խոսակցությունները չեն համապատասխանում իրականությանը։ Հարությունյանն ընդգծել է, որ Փաշինյանի ղեկավարած «ժողովրդավարական Հայաստանում» ձերբակալված են քաղաքական գործիչներ, հոգեւորականներ, լրագրողներ, որոնք ընդդիմադիր հայացքների կողմնակից են, իսկ պաշտոնյաները, որոնց տասնամյակներ շարունակ քննադատել է ինքը՝ Փաշինյանը, մեղադրել նրանց կոռուպցիայի եւ թալանի մեջ, հանգիստ շարունակում են մնալ ազատության մեջ, երբեմն այցելում են դատարաններ, երբեմն նրանցից առգրավում են բրենդային կոստյում կամ մի կտոր հող, եւ վերջ։
Հարությունյանի խոսքով՝ «Հայրենիք» կուսակցությունն անհանգստացնում է Փաշինյանին ստեղծված օրվանից, եւ պայքարը դադարեցնել չի պատրաստվում, ընդհուպ մինչեւ այն, երբ տեղի կունենա երկար սպասված իշխանափոխությունը։
«Բոլորի համար պարզ է, թե ինչու են լռում եվրոպական կառույցները։ Կան իշխանություններ, որոնք տարբեր միջազգային կենտրոններին հաճոյանալու համար զիջումների են գնում Հայաստանի շահերի հաշվին։ Կան նաեւ երկակի ստանդարտներ»,- նշել է քաղաքական գործիչը՝ ավելացնելով, որ կուսակցությունը քայլեր է ակնկալում ԵՄ-ից։
Գալստյանի փաստաբան Արսեն Բաբայանը հայտնել է, որ երեկ այցելել է իր պաշտպանյալին։ Նա ընդգծել է, որ չկա որեւէ ապացույց, որը կապում է Գալստյանին ենթադրյալ հանցագործության հետ կամ որը կարող է հիմք հանդիսանալ ձերբակալության համար։ «Սա խոսում է հակառակորդների նկատմամբ քաղաքական հետապնդման մասին։ Նրանք ընտրություններից առաջ տարածում են վախի մթնոլորտ, որպեսզի բոլորը իմանան, որ կարող են ձերբակալվել իրենց կարծիքը հայտնելու համար։ Ես պետք է հիասթափեցնեմ ձեզ. Հայաստանում քիչ մարդիկ կան, որոնց կարելի է վախեցնել»,- հայտարարել է Բաբայանը։ Նրա խոսքով՝ երկրում այնքան շատ քաղբանտարկյալներ կան, որ «մենք չենք կարողանում հետեւել. իրավիճակն աննախադեպ է»։ Մենք ակնկալում ենք, որ եվրոպական կառույցները կբացեն իրենց աչքերը եւ կտեսնեն, թե ինչ է կատարվում, ավելացրել է փաստաբանը։
Բողոքի ակցիայի ժամանակ ԵՄ պատվիրակությանն է հանձնվել նամակ՝ պաշտպանություն Խաչիկ Գալստյանի եւ Արամ Քոչարյանի։
Հիշեցնենք, որ ընդդիմադիր «Հայրենիք» կուսակցության գլխավոր քարտուղար Խաչիկ Գալստյանը ձերբակալվել է դեկտեմբերի 30-ի գիշերը։ Ավելի ուշ լուրեր տարածվեցին Վաղարշապատում կուսակցության մեկ այլ ներկայացուցչի՝ Արամ Քոչարյանին ձերբակալելու մասին։
Երկուսն էլ մեղադրվում են Վաղարշապատում տեղի ունեցած տեղական ինքնակառավարման մարմինների ընտրությունների ժամանակ կաշառք բաժանելու մեջ։
