Նիդեռլանդները Ուկրաինային լրացուցիչ 250 միլիոն եվրո ռազմական աջակցություն կտրամադրի PURL նախաձեռնության միջոցով, որը թույլ է տալիս եվրոպական երկրներին զենք գնել ԱՄՆ պաշարներից: Այս մասին հայտարարել է Նիդեռլանդների պաշտպանության նախարարի պաշտոնակատար Ռուբեն Բրեկելմանսը:
«Այսօր ես հայտարարում եմ Ուկրաինային՝ PURL-ի միջոցով 250 միլիոն եվրո հատկացնելու մասին։ Սա միակ միջոցն է շատ կարճ ժամկետում ավելի շատ հակաօդային պաշտպանության (ՀՕՊ) զինամթերք, ինչպես նաև F-16-ների համար նախատեսված զինամթերք և ԱՄՆ-ի պաշարներից այլ նյութեր ստանալու համար»,— ասել է նա Բրյուսելում ԵՄ երկրների պաշտպանության նախարարների հանդիպման նախօրեին։
PURL նախաձեռնությունը (Prioritised Ukraine Requirements List՝ Ուկրաինայի պահանջների առաջնահերթ ցանկ) գործարկվել է ԱՄՆ նախագահ Դոնալդ Թրամփի և ՆԱՏՕ-ի գլխավոր քարտուղար Մարկ Ռյուտեի կողմից հուլիսի 14-ին։ Այս մեխանիզմի համաձայն՝ ՆԱՏՕ-ի դաշնակիցները Ուկրաինայի համար զենք են գնում ամերիկյան պաշարներից։ PURL գծով մատակարարումները պետք է իրականացվեն ամեն երկու-երեք շաբաթը մեկ։
