Իսրայելը ողջունում է Քրիստոնեա-դեմոկրատական եւ Քրիստոնեա-սոցիալական միությունների (ՔԴՄ/ՔՍՄ) դաշինքի հաղթանակը Գերմանիայի խորհրդարանական ընտրություններում եւ հույս ունի ամրապնդել կապերը Բեռլինի հետ նոր դաշնային կառավարության օրոք։ Այս մասին հայտնել է Իսրայելի վարչապետ Բենիամին Նեթանյահուն։
«Շնորհավորանքներ [ՔԴՄ-ի առաջնորդ] Ֆրիդրիխ Մերցին եւ ՔԴՄ/ՔՍՄ-ին այսօրվա ընտրություններում ակնհայտ հաղթանակի կապակցությամբ: Ես ակնկալում եմ սերտորեն աշխատել ձեր ապագա կառավարության հետ՝ մեր երկրների միջեւ գործընկերության հետագա ամրապնդման համար»,- գրել է նա X-ում:
Իր հերթին, Իսրայելի արտգործնախարար Գեդեոն Սաարը, միանալով շնորհավորանքներին, Մերցին անվանել է «Իսրայելի բարեկամ» եւ հրավիրել նրան այցելել հրեական պետություն: «Ես համոզված եմ, որ որպես Իսրայելի բարեկամ՝ դուք կամրապնդեք եւ կխորացնեք կապերը Գերմանիայի եւ Իսրայելի ժողովուրդների միջեւ։ Մենք անհամբեր սպասում ենք ձեր առաջին այցին Երուսաղեմ որպես կանցլեր»,- գրել է Սաարը X-ում:
