Մոսկվան և Վաշինգտոնը շատ շուտով կանցկացնեն խորհրդակցությունների երրորդ փուլը՝ երկկողմ բարդ հարցերի քննարկման համար: Ինչպես տեղեկացնում է ՏԱՍՍ գործակալությունը, այդ մասին լրագրողներին հայտնել է ՌԴ արտաքին գործերի փոխնախարար Սերգեյ Ռյաբկովը:
«Մոտենում է կնճռոտ հարցերի շուրջ երկկողմ խորհրդակցությունների երրորդ փուլը: Առայժմ վաղ է խոսել կոնկրետ ժամկետի մասին, բայց այն, հուսով եմ, կկայանա շատ շուտով», - ասել է փոխնախարարը:
Միևնույն ժամանակ, Ռուսաստանի նախագահի մամուլի քարտուղար Դմիտրի Պեսկովը լրագրողներին հայտնել է, որ Մոսկվան և Վաշինգտոնը ներկայում մշտական կապի մեջ են, և դա օգնում է հասկանալ միմյանց և շարժվել առաջ։
«Մենք աշխատանքային շփումներ ունենք Վաշինգտոնի, (ԱՄՆ նախագահ) Թրամփի թիմի ներկայացուցիչների հետ։ Եվ անհրաժեշտության դեպքում նախագահներն իրենք են անմիջական շփումներ ունենում և քննարկում հրատապ հարցերը։ Դա այն է, ինչ տեղի է ունենում հիմա մշտապես։ Դա մեզ օգնում է ապահովել միմյանց դիրքորոշումների ըմբռնումը և շարժվել առաջ», - ասել է Կրեմլի ներկայացուցիչը:
