Մարտուն Գրիգորյանը չի հանդիսացել և այժմ էլ չի հանդիսանում «Հանրապետական» կուսակցության անդամ, լրագրողների հետ հանդիպմանն այս մասին հայտարարեց ԱԺ «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով Գյումրիի և Մարտուն Գրիգորյանի շուրջ զարգացումներին։
Նա նշեց, թե «Հանրապետական» կուսակցությունը, հաշվի առնելով նշված գործոնները, իրեն իրավունք չի վերապահում ճնշում գործադրել կամ ուղղորդել իր խմբակցության անկուսակցական անդամի նկատմամբ։
«Մենք մեր գործընկերոջը հայտնել ենք մեր կարծիքը թեմայի հնարավոր հանգուցալուծման մասին, սակայն զերծ ենք մնում այն հանրայնացնելուց, որպեսզի դա չդիտվի որպես ճնշում կամ ազդեցություն Մարտուն Գրիգորյանի վրա»,- նշեց Աբրահամյանը։
Պատգամավորը նաև ընդգծեց, որ վերջին օրերին Մարտուն Գրիգորյանի վերաբերյալ տարածվող տեղեկատվական հոսքը համարում է գարշելի և անընդունելի։ Նրա խոսքով, Գրիգորյանը, որպես մարդ և քաղաքական գործիչ, որևէ կերպ արժանի չէ նման վերաբերմունքի։
«Այս օրերին շատ կողմեր թեման օգտագործում են «Հանրապետական» կուսակցության և Սերժ Սարգսյանի թիրախավորման համար։ Կա տպավորություն, որ որոշ ուժերի նպատակը ոչ թե Գյումրիում Վարդան Ղուկասյանին քաղաքապետ դարձնելն է, այլ Մարտուն Գրիգորյանի հայտարարությունները օգտագործելով՝ կուսակցության դեմ արշավը շարունակելը։ ՀՀԿ-ն պատրաստ է ցանկացած պայքարի՝ ամենակոշտին էլ, և մենք թույլ չենք տա, որ մեր անունը, մեր ուժի քաղաքական գործունեությունը որևէ ձևով վարկաբեկվի կամ սևացվի»,- ասաց Աբրահամյանը։
Անդրադառնալով Մարտուն Գրիգորյանի հայտարարությանը, թե ՔՊ-ն Գյումրիում քաղաքապետ չի ունենալու՝ Տիգրան Աբրահամյանն արձագանքեց.
«Վստահ եմ, որ Մարտուն Գրիգորյանի մտքով երբևէ չի անցել անել մի քայլ, որը կարող է որևէ ձևով նպաստ բերել ՔՊ-ականների քաղաքականությանը։
Կան մարդիկ, ովքեր կարծում են, որ պրիմիտիվ իրավիճակ է, որը ստանդարտ լուծում է ենթադրում և դա տեղի չի ունենում. այդպես չէ»։
