Ոչ մեկի համար գաղտնիք չէ, որ Հայաստանի գործող իշխանությունները ԱՄՆ նախագահական վերջին ընտրությունների ժամանակ լայն թափով աշխատել են նորընտիր նախագահ Թրամփի հակառակորդ՝ դեմոկրատ Քամալա Հարիսի օգտին։ Այս գործում իշխանության ջանքերը համակարգել է ԱՄՆ-ում Հայաստանի դեսպան Լիլիթ Մակունցը։ Սրա մասին մամուլը բազմաթիվ հրապարակումներ ունի։
Թրամփի թիմը, լավատեղյակ լինելով Հայաստանի իշխանությունների վարքագծին, իշխանության գալուց անմիջապես հետո որպես պատասխան՝ անտեսում է Փաշինյանին ու իր թիմին։ Փաշինյանին և իր թիմակիցներին առ այսօր չի հաջողվում որևէ բարձր մակարդակի հանդիպում ունենալ ԱՄՆ գործող իշխանությունների հետ։
Այս իրավիճակը նյարդայնացնում է Նիկոլ Փաշինյանին, և ըստ որոշ տեղեկությունների՝ նա ելքեր է փնտրում, որպեսզի կարողանա արժանանալ Թրամփի վարչակազմի բարեհաճությանը։ Նույն աղբյուրների համաձայն՝ Փաշինյանը պատրաստվում է դեսպան Մակունցին հետ կանչել և ԱՄՆ իշխանություններին հավաստիացնել, որ դեմոկրատների օգտին իր աշխատանքը եղել է անձնական նախաձեռնություն, որի համար նա պատժվել է։ Փաշինյանը հույս ունի, որ ԱՄՆ-ում կգնահատեն իր այս քայլը։
