Ուկրաինայի նախագահ Վոլոդիմիր Զելենսկին ժամանել է Փարիզ՝ Ֆրանսիայի իր պաշտոնակից Էմանուել Մակրոնի հետ հանդիպման: Երկու ղեկավարները Ելիսեյան պալատի դիմաց միմյանց ձեռք են սեղմել և ներս մտել։ Այս մասին հաղորդում է Reuters գործակալությունը:
Ավելի վաղ Մակրոնը հայտարարել էր, որ Զելենսկու հետ կքննարկի Ուկրաինայում «արդար և տևական խաղաղության պայմանները»:
Ֆրանսիայում Զելենսկին նաև կայցելի Dassault Aviation ավիատիեզերական ընկերության ձեռնարկություն, որն արտադրում է Rafale կործանիչներ:
Փարիզ այցից առաջ Զելենսկին շնորհակալություն է հայտնել ԱՄՆ-ին և անձամբ նախագահ Դոնալդ Թրամփին պատերազմն ավարտելու գործում ինտենսիվ կերպով ներգրավվելու համար:
Ֆլորիդայում ուկրաինական և ամերիկյան պատվիրակությունների հանդիպման ավարտից հետո Զելենսկին զրուցել է Ֆինլանդիայի նախագահ Ալեքսանդր Ստուբի հետ, տեղեկացրել նրան բանակցությունների մասին:
«Կան դժվար հարցեր, որոնց վրա դեռ պետք է աշխատել», - գրել է Զելենսկին իր Telegram ալիքում:
Ավելի վաղ Ուկրաինայի նախագահը զրուցել է Եվրահանձնաժողովի նախագահ Ուրսուլա ֆոն դեր Լայենի և ՆԱՏՕ-ի գլխավոր քարտուղար Մարկ Ռյուտեի հետ:
Նոյեմբերի 30-ին Միացյալ Նահանգների և Ուկրաինայի պաշտոնյաները Ֆլորիդայում բանակցությունների ժամանակ քննարկել են ռուս-ուկրաինական հակամարտության ավարտի ամերիկյան ծրագիրը: Բանակցություններից հետո պետքարտուղար Մարկո Ռուբիոն հայտարարել է, որ հանդիպումն արդյունավետ էր, բայց դեռ շատ աշխատանք կա անելու: Ռուբիոյի խոսքով՝ հարցը միայն պատերազմի ավարտը չէ, այլև Ուկրաինայի ապագայի ապահովումը: Ուկրաինական պատվիրակության ղեկավար, Ազգային անվտանգության խորհրդի քարտուղար Ռուստեմ Ումերովն իր հերթին հանդիպումը որակել է արդյունավետ և հաջող՝ նշելով, որ Միացյալ Նահանգները մեծ աջակցություն է ցուցաբերում:
