2028 թվականի Օլիմպիական խաղերի ժամանակ հանդիսատեսները կարող են թռչել Լոս Անջելեսի երկնքով և խուսափել քաղաքի մեծ խցանումներից, եթե կազմակերպիչները կարողանան դրա համար թույլտվություն ստանալ։ Այս մասին հաղորդում է BBC-ն։
Լոս Անջելեսում երրորդ ամառային խաղերը կազմակերպող հանձնաժողովը՝ LA28-ը, հայտարարել է Archer Aviation-ի հետ գործընկերության մասին՝ Օլիմպիական և Պարալիմպիկ խաղերի ժամանակ օդային տաքսի ծառայություն մատուցելու համար։
LA28-ը հայտարարել է, որ ընկերությունը նախատեսում է օգտագործել օդային նավատորմ՝ երկրպագուներին դեպի խաղերի անցկացման վայրեր տեղափոխելու և հետ տանելու համար։
Ըստ BBC-ի՝ թռչող տաքսիները վաղեմի երազանք են եղել։ Դրանց դեբյուտը նախատեսված էր 2024 թվականի Փարիզի օլիմպիական խաղերում, բայց դրանք ժամանակին չհավաստագրվեցին Եվրոպայի օդային անվտանգության գործակալության կողմից։
Բացի այդ, Archer Aviation-ը դեռևս չի հավաստագրվել ԱՄՆ Դաշնային ավիացիոն վարչության կողմից, ինչը նշանակում է, որ օդային տաքսիները դեռևս պատրաստ չեն կոմերցիոն օգտագործման համար։ Ընկերության հիմնադիր և գործադիր տնօրեն Ադամ Գոլդստեյնը հայտարարել է, որ հույս ունի այս տարի ավիացիոն կարգավորող մարմնի կողմից ստանալ այն կարևոր փաստաթուղթը, որը կհաստատի, որ ընկերությունը համապատասխանում է անվտանգության չափանիշներին։
Եթե Archer Aviation-ը ժամանակին ստանա հավաստագիր 2028 թվականի Օլիմպիական խաղերի համար, ապա օդային տաքսիները կառաջարկեն 10-20 րոպեանոց թռիչքներ բնակիչներին և այցելուներին, ինչպես նաև կթռչեն ընտրված ուղղություններով, այդ թվում՝ Օլիմպիական խաղերի անցկացման մի քանի խոշորագույն վայրեր։
Հստակ չէ, թե որքան կարժենա յուրաքանչյուր ուղևորությունը, սակայն Archer Aviation-ի հիմնադիր և գործադիր տնօրեն Ադամ Գոլդստեյնն, ըստ Los Angeles Times-ի, ասել է, որ ցանկանում է, որ գները համադրելի լինեն բարձրակարգ Uber-ի հետ։
Հաճախորդները կկարողանան օդային տաքսի պատվիրել հավելվածի միջոցով։ Մեկ օդային տաքսին կարող է տեղափոխել մինչև չորս մարդու։
