Հունաստանի Լեսբոս կղզու ափերին միգրանտների տեղափոխող նավակ է խորտակվել, որի հետևանքով 7 մարդ է զոհվել, այդ թվում, մեկ տղա, մեկ աղջիկ և երկու կին։ Այս մասին հաղորդում է Reuters գործակալությունը՝ վկայակոչելով Հունաստանի առափնյա պահպանության ծառայության հաղորդագրությունը։
Առափնյա պահպանության ծառայության պարեկները նավակը նկատել են գիշերը ժամը 2-ի մոտակայքում, Լեսբոս կղզուց հյուսիս։ 23 միգրանտ փրկվել է։ Որոնողափրկարարական աշխատանքները շարունակվում են։ Թե քանի մարդ է եղել նավակում, առայժմ հայտնի չէ։
Մերձավոր Արևելքից, Աֆրիկայից և Ասիայից միգրանտները հաճախ են օգտագործում Հունաստանը Եվրոպա ներգաղթելու համար։ 2015 թվականին Հունաստանի կղզիներ է ժամանել գրեթե 1 միլիոն ներգաղթյալ։
2024 թվականին Հունաստան է հասել 54 000 միգրանտ, ինչը կազմել է հարավային Եվրոպայում ամենամեծ ցուցանիշն Իտալիայից հետո։ Նրանց մեծ մասը ժամանել է ծովով։
