Շիրակի մարզում կորոնավիրուսային իրավիճակը կայուն է ու կառավարելի: Ինչպես տեղեկացնում է «Արմենպրես»-ը, «Գյումրի բժշկական կենտրոն»-ի տրիաժ բաժանմունքում կա 12 հիվանդ:
«Մարզում այս հիվանդությամբ ստացիոնար ծառայություն մատուցող բուժհաստատություն այս պահին չկա՝ ստացիոնար բուժման ուղեգրված հիվանդները մեկնում են երևանյան հաստատություններ»,-«Արմենպրես»-ին հայտնեց Շիրակի մարզպետարանի առողջապահության բաժնի պետ Լեյլի Ասլանյանը՝ տեղեկացնելով, որ հիվանդների ընդհանուր թիվը բարձր չէ, և չկա անհրաժեշտություն այս պահին մարզում կորոնավիրուսային բուժում իրականացնող ստացիոնար հաստատության վերաբացման:
Մարզում վերջին օրերին բավական ակտիվացել է պատվաստվողների թիվը: «Բավական ակտիվացել է գործընթացը: Այս պահին մարզում ունենք ընդհանուր պատվաստված 14 հազար 738 քաղաքացի, որը կազմում է մարզի բնակչության 6,4 տոկոսը: Ցուցանիշով մարզը հանրապետությունում լավագույններից է»,-նշում է Լեյլի Ասլանյանը՝ տեղեկացնելով, որ շիրակցիներն առավել շատ նախընտրել են պատվաստվել Sputnik V պատվաստանյութով, երկրորդ տեղում CoronaVac-ն է և երրորդում` AstraZeneca-ն:
Սրան զուգահեռ մարզպետարանի պատասխանատուն նշեց, որ մարզում կան նաև սեզոնին բնորոշ աղիքային վարակների դեպքեր, սակայն ցուցանիշը նորմերի մեջ է և անհանգստություն չի պատճառում:
