Խորվաթիան Գերմանիայի հետ համաձայնությամբ Ուկրաինային կփոխանցի 30 հատ M-84 տանկ և 30 հատ M-80 հետևակի մարտական մեքենա, ինչի համար զեղչ կստանա 50 հատ Leopard 2A8 գնելու դեպքում։ Այս մասին հայտնում է Խորվաթիայի պաշտպանության նախարարությունը։
«Փոխվարչապետ, պաշտպանության նախարար Իվան Անուսիչը և Խորվաթիայի զինված ուժերի գլխավոր շտաբի պետ, գեներալ-գնդապետ Տիհոմիր Կունդիդը Գերմանիա կատարած այցի ընթացքում երկուշաբթի՝ հոկտեմբերի 28-ին, Բեռլինում հանդիպել են Գերմանիայի պաշտպանության նախարար Բորիս Պիստորիուսի հետ։ . Գերմանիայի պաշտպանության նախարարությունում կայացած երկկողմ հանդիպման ժամանակ նախարար Անուսիչն ընդգծել է, որ Գերմանիան Խորվաթիայի համար կարևոր պաշտպանական գործընկեր է, և առաջնահերթությունը այդ համագործակցության հետագա ամրապնդումն ու ընդլայնումն է»,- ասված է հաղորդագրությունում։
«Հանդիպման հիմնական թեման խորվաթական բանակի սարքավորումներն ու արդիականացումն էր՝ շեշտը դնելով նոր Leopard 2A8 տանկերի ձեռքբերման վրա։ Գերմանիայի Դաշնային Հանրապետությունը Խորվաթիայի Հանրապետությանը հրավիրել է միանալու Leopard 2A8 հիմնական մարտական տանկերի ձեռքբերման գերմանական համատեղ ծրագրին։ Պաշտպանության նախարարներ Անուսիչը և Պիստորիուսը ստորագրել են մտադրության փաստաթուղթ, որում պատրաստակամություն են հայտնել Ուկրաինային մատակարարել 30 խորվաթական M-84 տանկ և 30 M-80 հետևակի մարտական մեքենաներ, պահեստամասեր և զինամթերք: Ֆինանսական միջոցները, որոնք Խորվաթիան կստանա Գերմանիայից այդ տանկերի և մարտական մեքենաների համար, կուղղվեն գերմանական նոր Leopard 2A8-ների ձեռքբերմանը»,- պարզաբանել են ՊՆ-ում։
«Հաշվի առնելով իր բանակի կարիքները՝ Խորվաթիան նախատեսում է գնել մինչև 50 նոր Leopard 2A8: Մնացած բոլոր մանրամասները հայտնի կդառնան պայմանագրի կնքումից հետո»,- հայտնել են նախարարությունից։
