Կառավարության օգոստոսի 6-ի նիստին չզեկուցվող հարցերի շարքում ընդունվել են երեք նախարարության անվանափոխության նախագծերը։
Ըստ առաջարկվող փոփոխությունների՝ Արտաքին գործերի նախարարությունը կվերանվանվի Արտաքին գործերի և միջազգային առևտրի նախարարություն, Բարձր տեխնոլոգիական արդյունաբերության նախարարությունը՝ Բարձր տեխնոլոգիական արդյունաբերության և արհեստական բանականության նախարարություն, իսկ Աշխատանքի և սոցիալական հարցերի նախարարությունը՝ Աշխատանքի և բարեկեցության նախարարություն։
Մինչ կառավարության կողմից հավանության արժանանալը, նախագիծը դրվել էր հանրային քննարկման, որտեղ ներկայացվել էին մի շարք դիտողություններ և առաջարկություններ, հատկապես Բարձր տեխնոլոգիական արդյունաբերության նախարարության անվանափոխության վերաբերյալ։
Մասնավորապես, նշել էր, որ «արհեստական բանականություն» բառակապակցության ավելացումը չհիմնավորված ավելորդություն է, քանի որ «բարձր տեխնոլոգիական արդյունաբերություն» հասկացությունն արդեն իսկ ներառում է այդ ուղղությունը։ Առաջարկվում էր անվանման մեջ շեշտել ռազմարդյունաբերության ոլորտը՝ դարձնելով այն «Բարձր տեխնոլոգիական և ռազմական արդյունաբերության նախարարություն»։ Նախագծի վերաբերյալ նմանատիպ կարծիքներ էին հայտնել նաև քաղաքացիները՝ անվանափոխությունը համարելով ավելորդ։
Անվանափոխությունը իրագործելու համար տասնյակ օրենքներում փոփոխություններ տեղի կունենան, ինչի համար կառավարության առաջարկով Ազգային ժողովն արտահերթ նիստ կգումարի։
