Իսրայելը մտադիր է վերսկսել ռազմական գործողությունները Գազայի հատվածում, եթե պաղեստինյան ՀԱՄԱՍ շարժումը հրաժարվի զինաթափվել։ Ինչպես տեղեկացնում է Times of Israel-ը, այս մասին հայտարարել է Իսրայելի պաշտպանության նախարար Իսրայել Կացը։
«Եթե ՀԱՄԱՍ-ը հրաժարվի կատարել համաձայնագրի պայմանները, Իսրայելն ԱՄՆ-ի հետ համակարգված կերպով կվերսկսի մարտական գործողությունները և կգործի՝ հանուն ՀԱՄԱՍ-ի լիակատար ջախջախման, Գազայում իրականությունը փոխելու և հասնելու պատերազմի բոլոր նպատակներին», - ասվում է Կացի գրասենյակի հայտարարության մեջ։
Կացը հրամայել է բանակին պատրաստել գործողությունների «համապարփակ ծրագիր»՝ Գազայում մարտական գործողությունները վերսկսելու անհրաժեշտության դեպքում։
Ավելի վաղ X-ում արված գրառման մեջ Կացը նշել էր, որ պայմանավորվածությունների ցանկացած խախտում կարժանանա անհապաղ արձագանքի։ «Երեկ ահաբեկիչները, որոնք փորձեցին մոտենալ և անցնել, կանխվեցին, և դա կշարունակվի նաև ապագայում»,- նշել է Կացը գրառման մեջ։
