Իսրայելի հետ սահմանի մոտ գտնվող սիրիական գյուղերի բնակիչները վրդովված են հրեական պետության զինվորականների ներխուժումից։ Նրանք բողոքի ցույցեր են կազմակերպում՝ վախենալով «իսրայելական երկարատև օկուպացիայից», գրում է ամերիկյան The Wall Street Journal (WSJ) թերթը։
Նրա տեղեկություններով՝ սահմանամերձ գոտում գտնվող սիրիական որոշ գյուղեր հրաժարվում են հանձնվել իսրայելական զորքերին, որոնք սիրիական տարածք են մտել արաբական հանրապետությունում իշխանափոխությունից հետո։ Նրանց ներկայացուցիչներն ասում են, որ իշխանությունը փոխանցելու են միայն նոր իշխանության ուժերին։ Մասնավորապես, բողոքի ցույցեր են սկսվել Մաարիա գյուղում, որտեղ բախումների ժամանակ առնվազն մեկ մարդ է զոհվել։
Թերթը գրում է, որ Կունեյտրայի նահանգի ութ գյուղերի ղեկավարները ընդհանուր հայտարարություն են ստորագրել՝ իսրայելցի զինվորականներից պահանջելով լքել իրենց տարածքները։ Ինչպես նշում է թերթը, տեղի բնակիչները դժգոհ են, որ իսրայելական ներկայությունը տարածքում սահմանափակում է իրենց տեղաշարժը և հասանելիությունը հիմնական կարիքներին, ինչպիսիք են սնունդը, ջուրը և էլեկտրականությունը։
«Որքան դա շարունակվի, այնքան ավելի մեծ է մտավախությունը, որ [բողոքի ցույցերը] կվերաճեն զինված առճակատման», - թերթը մեջբերում է ամերիկյան Մերձավոր Արևելքի ֆորումի (MEF) վերլուծական կենտրոնի Սիրիայի փորձագետ Էյմեննա Ջավադ ալ-Թամիմիի խոսքերը: Նրա կարծիքով, Սիրիայի տարածքում իսրայելական զորքերի առկայությունը «վախ, դժգոհություն և վրդովմունք է առաջացնում» տեղի բնակչության մոտ։
