Իրանն Արաքս գետի աղտոտման վերաբերյալ ծանուցում է ներկայացրել Հայաստանին և հանքարդյունաբերական ընկերությանը, գրում է Pars Today-ը։
Իրանի ջրային ռեսուրսների կառավարման ընկերության բարձրաստիճան պաշտոնյաներից Իսա Բոզորգզադեն «Իլնա» լրատվական գործակալությանը տված հարցազրույցում անդրադառնալով Հայաստանի կողմից Արաքս գետի աղտոտման կապակցությամբ Իրանի գործողություններին, ասել է.
«Արաքս գետի ջրի որակը և աղտոտվածությունն Իրանի էներգետիկայի նախարարության կարմիր գիծն է: Մենք ունենք որակը ստուգելու համատեղ աշխատանքային խմբեր և աղտոտման վերաբերյալ ծանուցումներ են ուղարկվել հայկական կողմին և հանքարդյունաբերությամբ զբաղվող ընկերությանը»:
Նա հավելել է. «Խմբային մոնիտորինգն իրականացվում է Իրանի էներգետիկայի նախարարության և շրջակա միջավայրի պահպանության կազմակերպության կողմից: Բացի այդ, լրացուցիչ հետազոտություններ են իրականացվում Թավրիզի բժշկական գիտությունների համալսարանի, ինչպես նաև անասնաբուժական ջրային բաժանմունքում»:
«Մենք հետևում ենք, որպեսզի ջրի որակը չսպառնա մեր քաղաքացիների առողջությանը»,-նշել է Բոզորգզադեն։
