ԱՄՆ պետքարտուղար Էնթոնի Բլինկենը չի մասնակցի ՄԱԿ-ի կլիմայական COP29 համաժողովին, որը կանցկացվի Բաքվում։ Նոյեմբերի 11-ից 22-ը երկրի ավելի քան 20 նախարարությունների, գերատեսչությունների և կազմակերպությունների ԱՄՆ բարձրաստիճան պաշտոնյաները կմեկնեն Ադրբեջան՝ ընդգծելու ԱՄՆ առաջնորդությունը կլիմայական ճգնաժամի դեմ պայքարում և աշխատելու ՄԱԿ-ի Կլիմայի փոփոխության համաժողովում (COP29) կայուն, համաձայնեցված արդյունքների հասնելու:
ԱՄՆ պատվիրակությունը կգլխավորի նախագահի կլիմայի միջազգային քաղաքականության գծով ավագ խորհրդական Ջոն Պոդեստան։
Պատվիրակության կազմում են նաև գյուղատնտեսության նախարար Թոմաս Վիլսակը, էներգետիկայի նախարար Ջենիֆեր Գրանհոլմը, նախագահի օգնական և Սպիտակ տան կլիմայի հարցերով ազգային խորհրդական Ալի Զայդին, Սպիտակ տան շրջակա միջավայրի որակի գծով խորհրդի նախագահ Բրենդա Մալորին, էներգետիկայի փոխնախարար Դեյվիդ Թյուրքը, Ներքին գործերի փոխնախարարի պաշտոնակատար Լորա Դանիել-Դևիսը, Շրջակա միջավայրի պահպանության գործակալության փոխտնօրենի պաշտոնակատար Ջեյն Նիշիդաը, փիլիսոփայության դոկտոր, առևտրի փոխնախարար օվկիանոսային և մթնոլորտային հարցերի գծով և Օվկիանոսային և մթնոլորտային ազգային վարչության ադմինիստրատոր Ռիկ Սփինրադը, Զենքի և միջազգային անվտանգության հարցերով փոխնախարար Բոնի Ջենկինսը։
«Բացի այդ, ԱՄՆ պատվիրակությունը կներառի ԱՄՆ կառավարության այլ պաշտոնյաների լայն շրջանակ, ովքեր ուսումնասիրում են, թե ինչպես է կլիմայի փոփոխությունը կապված զինված հակամարտությունների, ֆինանսների, պարենային անվտանգության, գենդերային խնդիրների, գլոբալ առողջության, առևտրի և ներդրումների, երիտասարդության հետ և այլն»,- ասել է Պետդեպարտամենտը։
