Հայաստանը միարժեքորեն պատրաստ է կնքել «Խաղաղության պայմանագիրը», և Ադրբեջանի կողմից հնչեցված մտքերը որպես նախապայման չեմ դիտարկում: Այս մասին այսօր՝ ապրիլի 3-ին, լրագրողների հետ զրույցում հայտարարեց Արդարադատության նախարար Սրբուհի Գալյանը՝ պատասխանելով հարցին, թե Ադրբեջանի նախագահ Իլհամ Ալիևը կրկին առաջ է քաշում նախապայմաններ խաղաղության համաձայնագիրը ստորագրելու համար՝ մասնավորապես պահանջում է Մինսկի խմբի համանախագահության լուծարում և ՀՀ Սահմանադրության փոփոխություն:
«Հայաստանը պատրաստ է կնքել խաղաղության պայմանագիրը, ընդ որում, այդ հնչեցված մտքերը որպես նախապայմաններ չեմ դիտարկում և կարծում եմ՝ կառավարությունն էլ չի դիտարկում: Խաղաղությունն այլընտրանք չունի, և մեր գործողությունները պետք է միտված լինեն խաղաղության վերջնական հաստատմանը: Թե ինչ կոնցեպտով պետք է առաջ շարժվենք դեպի խաղաղության պայմանգրի կքնումը, կարծում եմ՝ շատ շուտով հանրությանը հայտնի կլինի»,- հայտարարեց նախարարը:
Ինչ վերաբերում է Սահամանդրության փոփոխություններին, Գալյանն ասաց, որ բազմիցս է նշել, որ աշխատում են նոր տեքստի վրա, այս պահին տեքստի մասով մանրամասներ ասել չի կարող, բայց այդ տեքստը չի լինելու գաղտնի, ինչ-որ պահին հանրայնացվելու է և յուրաքանչյուր կետ քննարկվելու է հանրության հետ:
Ճշտող հարցին՝ հնարավո՞ր է ՀՀ իշխանությունն արագացնի Սահմանադրության փոփոխության գործընթացը, նա ասաց. «Եթե խոսքը նոր Սահամանադրության մասին է, ապա դա պարզ առաջադրանք չէ, որ կարելի է կատարել 1-3 ամսվա ընթացքում, դա մասնագետների տևական աշխատանք է պահանջում, խոսքը 8-10 ամսվա մասին է»:
Դիտարկմանը՝ արդյո՞ք հասել են Սահմանադրությունից Անկախության հռչակագիրը հանելուն կամ թողնելուն՝ նախարարը պատասխանեց.«Ոչ»։
