ՀՀ վարչապետի պաշտոնը զբաղեցնող Նիկոլ Փաշինյանը վստահեցնում է, որ Հայաստանը ԵԱՏՄ շրջանակում իր պարտավորությունները ճշգրիտ կատարել է, չվերացված սահմանափակում չունի:
Փաշինյանն այս մասին ասաց ԱԺ-ում կառավարության անդամների հետ հարցուպատասխանին՝ անդրադառնալով ՔՊ խմբակցության պատգամավոր Շիրակ Թորոսյանի հարցին:
«ԵԱՏՄ շրջանակներում ի սկզբանե եղել է և շարունակում է մնալ արձանագրում՝ ԵԱՏՄ երկրներում գոյություն ունեցող արգելքների և սահմանափակումների մասին: Խոսքն այն երևույթների մասին է, որ որոշ պայմաններում երկրների օրենսդրություններում կան դրույթներ, որոնք հակասում են ԵԱՏՄ իրավապայմանագրային բազային կամ տառին ու ոգուն: Եվ, իհարկե, ԵԱՏՄ մարմիններն աշխատում են այդ արգելքները վերացնելու ուղղությամբ»,-ասաց Փաշինյանը:
Վարչապետի պաշտոնը զբաղեցնողը վստահեցրեց, որ Հայաստանն իր բոլոր պարտավորությունները ճշգրիտ կատարել է:
«Մենք մեր պարտավորությունները ճշգրիտ կատարել ենք և այսօր ԵԱՏՄ շրջանակում չվերացված սահմանափակում չունենք: Այն, ինչ պլանավորվում էր 2022 թվականին իրականացնել, իրականացրել ենք»,-ասաց Փաշինյանը՝ արդյունավետ աշխատանքի համար շնորհակալություն հայտնելով ԱԺ-ին և գլխադասային հանձնաժողովին: Նրա խոսքով՝ կան թեմաներ, որոնք շարունակում են բանակցությունների սեղանին լինել ԵԱՏՄ շրջանակում: Եվ դրանցից մեկը գազի միասնական շուկայի ձևավորման մասին է:
Վարչապետի պաշտոնը զբաղեցնողի խոսքով՝ այդ ուղղությամբ հսկայական աշխատանք է կատարվել, բաց կան նրբություններ, որոնք դեռ հասցեագրման և լուծման կարիք ունեն:
«Կարծես թե կա ըմբռնում, որ մենք պետք է շարունակենք քննարկումները՝ մինչև այդ հարցերի լուծումը»,-նշեց Փաշինյանը:
