Մենք բոլորս կանգնած ենք ընտրության առաջ, այս պատմական ժամանակաշրջանում Ռուսաստանը հատուկ ռազմական գործողություն է իրականացնում, և փաստացի մենք խոսում ենք Արևմուտքի հետ պատերազմի մասին, որը ուկրաինացիների ձեռքերով կռվում է Ռուսաստանի դեմ։ Այս մասին նոյեմբերի 29-ին Ռուսաստան-Հայաստան հասարակական 2-րդ ֆորումի ժամանակ ասել է ՌԴ Պետդումայի փոխնախագահ Պյոտր Տոլստոյը։
«Այս աշխարհաքաղաքական իրավիճակում գայթակղություն է առաջանում։ Ես հիանալի հասկանում եմ այն մարդկանց, ովքեր հավատում են, որ իրենք այժմ հնարավորություն ունեն միանալ արևմտյան ճամբարին և ժամանակին հայտնվել պատմության ճիշտ կողմում», - նշել է նա։
Նա վստահեցրեց, որ Ռուսաստանը պատմականորեն երբեք խիստ կանոններ ու դոգմաներ չի պարտադրել այն մարդկանց ու երկրներին, որոնք կամ Ռուսաստանի մաս են եղել, կամ եղել են նրա դաշնակիցները։
«Խոսքը միշտ եղել է ընդհանուր գործի, ընդհանուր անվտանգության մասին: Ե՛վ Ռուսաստանի, և՛ Հայաստանի պատմության մեջ եղել են պահեր, երբ հենց Ռուսաստանն է օգնության հասել և փաստացիորեն փրկել Հայաստանը։ Մեր այս ընդհանուր պատմությունը նույնպես պետք է ազդի ընտրության վրա, որը կկատարի Հայաստանը։
Հասկանալի է, որ եվրոպական երազանքի ճնշման տակ մարդ իսկապես ցանկանում է ինչ-որ կերպ հայտնվել Եվրոպայում կամ դառնալ Մոնտե Կառլո, բայց սրանից ոչ մեկը չի լինի։ Ռուսաստանը կհաղթի հավաքական Արևմուտքի հետ պատերազմում, քանի որ մեր կողմում ճշմարտությունն է»,- ընդգծեց քաղաքական գործիչը։
Նրա խոսքով, Հայաստանում նախկին Խորհրդային Միության բոլոր երկրների թվում ԱՄՆ-ի ամենամեծ դեսպանատունն է, Հայաստանում են ամենաշատ շահույթ չհետապնդող կազմակերպությունները, որոնք գործում են ելնելով Արևմուտքի շահերից։
«Հայաստանում քաղաքական կուսակցությունները ստեղծվում են բացարձակապես բաց ձևով, ամբողջովին կախված արևմտյան փողերից և արևմտյան օրակարգը փոխանցելով Հայաստանի երիտասարդությանը»,- պարզաբանեց Տոլստոյը։
Նա հավելեց, որ Հայաստանի ղեկավարությունը որոշ ժամանակ է ձևացնում է, թե այլեւս չի նկատում ՀԱՊԿ-ը, Ռուսաստանը և այլ սուբյեկտներին։
«Այս ընտրությունը, որի մասին ես խոսում եմ, պետք է կատարեն երիտասարդները, ովքեր ներկայացնում են Հայաստանի ապագան։ Վստահ եմ, որ այս ընտրությունը ճիշտ կլինի։
Ինչ վերաբերում է տարբեր քաղաքական գործիչների ներկայիս հայտարարություններին, ովքեր փորձում են դիստանցավորվել Ռուսաստանից, ինձ թվում է, որ դա, ի վերջո, կավարտվի նրանով, որ նրանք իրենց արևմտյան տերերի հետ միասին կհայտնվեն պատմության աղբանոցում»,- ասաց Ռուսաստանի խորհրդարանի փոխխոսնակը։
Նրա խոսքով՝ մինչ Ղարաբաղում մարտերը շարունակվում էին, Հայաստանից պատգամավորներ էին գալիս Պետդումա և խնդրում էին Պուտինին ուղերձ փոխանցել՝ պատերազմը դադարեցնելու մասին։
«Այսօր նույն քաղաքական գործիչները Ռուսաստանին մեղադրում են անգործության մեջ։ Այս բոլոր հայտարարությունները մեկ շահ ունեն՝ արևմտամետ ուղղվածություն, որը ոմանք փորձում են ընտրել նյութական պարգևների համար։ Սակայն ինձ թվում է, որ Հայաստանի ապագան, Հայաստանի անկախությունը շատ ավելի արժեքավոր է, քան այն միլիոնավոր դոլարները, որոնք այսօր գործող իշխանության որոշ գործիչներ լցնում են իրենց գրպանը։ Վստահ եմ, որ պատմական բազան թույլ չի տա Հայաստանի երիտասարդների մոտ ձևավորել Ռուսաստանի մասին այն պատկերացումը, որը նրանք փորձում են պարտադրել»,- նշել է Տոլստոյը։
Նա ասաց, որ Ռուսաստանի Պետդումայում իրեն վստահել են Հայաստանի հետ միջխորհրդարանական հարաբերություններով զբաղվելը։
«Ես պատգամավոր եմ ընտրվել մի շրջանից, որտեղ շատ մեծ հայկական սփյուռք կա, ուստի շատ սերտ կապեր ունեմ Հայաստանի հետ»,- ասաց քաղաքական գործիչը։
