Հարավային Կորեայի Սահմանադրական դատարանը չի համաձայնել Ազգային ժողովի (խորհրդարան) փաստարկներին եւ չեղարկել է վարչապետ Հան Դոկ Սուի իմփիչմենթը։ «Մարտի 24-ին Սահմանադրական դատարանը հայտնել է, որ որոշել է մերժել վարչապետ Հան Դոկ Սուին իմփիչմենթի ենթարկելու միջնորդությունը»,- նշվել է դատարանի մամուլի ծառայության հաղորդագրությունում։ Ութ դատավորներից միայն մեկն է աջակցել վարչապետի իմփիչմենթին: Արդյունքում՝ Հան Դոկ Սուն վերականգնվել է, եւ նրան կվերադարձվի նաեւ նախագահի պաշտոնակատարի կարգավիճակը։ «Սահմանադրական դատարանի հինգ դատավորներ անհրաժեշտ են համարել մերժել իմփիչմենթը, մեկը պաշտպանել է այն, եւս երկուսը անհրաժեշտ են համարել մերժել միջնորդությունը [ձեւական հիմքերի բացակայության պատճառով]»,- նշվել է հրապարակման մեջ։ Որոշ փորձագետներ կարծում են, որ ներկա որոշումը կարող է ցուցիչ դառնալ, թե ինչ դատավճիռ կարող է ակնկալել Հարավային Կորեայի նախագահ Յուն Սոկ Յոլը նմանատիպ գործով։2024թ. դեկտեմբերի 27-ին խորհրդարանը իմփիչմենթ հայտարարեց վարչապետին։ Պատգամավորներն իրենց հիմնավորումներում ներկայացրել են հինգ պատճառ, այդ թվում՝ մեղադրել են Հան Դոկ Սուին դեկտեմբերի 3-ին ռազմական դրության ձեւով «ապստամբությանն օժանդակելու կամ նպաստելու» մեջ: Ինքը՝ Հան Դոկ Սուն, պնդում է, որ դեմ է եղել ռազմական դրության հաստատմանը եւ փորձել է նախագահին հետ պահել դրանից։
