Կորեայի Հանրապետության և ԱՄՆ-ի զինված ուժերն ավարտել են մարտի 10-ին մեկնարկած Freedom Shield լայնածավալ զորավարժությունները։ Այս մասին հայտնում է Հարավային Կորեայի միացյալ շտաբների պետերի կոմիտեն։
Զորավարժությունները հաստատել են Միացյալ Նահանգների և Կորեայի Հանրապետության համատեղ պաշտպանունակությունը և մեծացրել են ռազմական անձնակազմի միջև փոխկապակցվածությունը, ասել է կոմիտեն: Կոմիտեի զեկույցի համաձայն՝ «Կորեայի Հանրապետությունը և Միացյալ Նահանգները գործնական վարժանքներ են անցկացրել՝ հիմնված սցենարների վրա, որոնք արտացոլում են իրատեսական սպառնալիքներ, ներառյալ ԿԺԴՀ-ի զինված ուժերի կազմի և միջոցների փոփոխությունները, նրա մարտավարությունն ու ռազմավարությունը՝ ԿԺԴՀ-ի և Ռուսաստանի միջև տարբեր զինված հակամարտությունների և համագործակցության ուսումնասիրության արդյունքում»:
Հարավային Կորեայի շտաբների պետերի միացյալ շտաբի նախագահ Կիմ Մյոն Սուն ասել է, որ ինքը «մանրամասն քննարկել է ԱՄՆ-Հարավային Կորեա միացյալ հրամանատարության ղեկավարի հետ Փհենյանի և Մոսկվայի միջև ռազմական համագործակցության ազդեցությունը Կորեական թերակղզու անվտանգության վրա»։
Սրանք առաջին խոշոր զորավարժություններն էին ԱՄՆ նախագահ Դոնալդ Թրամփի երկրորդ ժամկետով նախագահի պաշտոնը զբաղեցնելու ժամանակ։ Հարավային Կորեան և ԱՄՆ-ն ամեն օգոստոսին անցկացնում են ևս մեկ խոշոր զորավարժություն՝ Ulchi Freedom Shield-ը՝ լայնածավալ պատերազմի սցենարով:
