Կառավարությունն իր այսօրվա՝ ապրիլի 30-ի նիստում «Հանրակացարանային բնակարանային ֆոնդի սեփականաշնորհման մասին» որոշում կայացրեց:
Հիմնավորման մեջ նշվում է, որ ՀՀ ՏԿԵՆ պետական գույքի կառավարման կոմիտեին ամրացված` Աբովյան քաղաքի Ուսանողական թաղամաս 4 շենքում (ճարտարագիտական քոլեջի հանրակացարան), Երևանի Մոլդովական փողոց, 29/1 շենքում և Երևանի Շիրակի փողոց 2/32 շենքում բնակվող, Ադրբեջանից բռնագաղթած և ՀՀ քաղաքացիություն ստացած քաղաքացիները դիմում են ներկայացրել որով խնդրել են իրենց կողմից զբաղեցրած բնակելի տարածքները սեփականության իրավունքով տրամադրել իրենց ընտանիքներին:
Ներկայումս Պետգույքի կոմիտեի տնօրինության տակ գտնվող տարածքների ճշգրտման աշխատանքների իրականացման արդյունքում հնարավոր են մակերեսների տարբերություններ, և նախագծի հավելվածի ցանկով նշված հասցեների նշված սենյակներում բնակվող քաղաքացիների հետ պայմանագիր կնքելիս առաջարկվում է նախագծում ներառել դրույթ՝ պայմանագիր կնքելիս հիմք ընդունել սահմանված կարգով գրանցում ստացած վկայականի հատակագծի մակերեսը՝ մինչև 3% թույլատրելի շեղումով։
