«Սիրիական դեմոկրատական ուժերի» (ՍԴՈՒ) քրդական ջոկատները լույս երկուշաբթի գիշերը Հալեպի նահանգում՝ Թիշրին ամբարտակի շրջանում, բախումների մեջ են մտել նոր իշխանությանը ենթակա սիրիական բանակի հետ, հայտնում է Syria TV հեռուստաալիքը՝ հղում անելով Սիրիայի Արաբական Հանրապետության (ՍԱՀ) բանակի 72-րդ բրիգադի իր ռազմական աղբյուրին։
«ՍԴՈՒ-ն գրոհել է դիրքերը Թիշրին ամբարտակի ուղղությամբ։ Մեր դիրքերը գրոհի են ենթարկվել ամբարտակի շրջանում՝ Սիրիաթել բարձունքի վրա»,- հեռուստաալիքը մեջբերում է աղբյուրի խոսքը։
ՍԱՀ բանակին հաջողվել է վերականգնել վերահսկողությունը երկու հենակետերի նկատմամբ, որոնք ավելի վաղ գրավվել էին քրդերի կողմից։
«Դաժան մարտերից հետո դեպքի վայր են ուղարկվել բանակի ուժեղացման մեծ շարասյուներ»,- նշում է աղբյուրը։
Քրդերի և բանակի միջև զինված լարվածության սրման պատճառը հեռուստաալիքը չի հստակեցնում։
