Գեղարքունիքի մարզի Սևան համայնքի Գեղամավան գյուղում «Դէկավվա» հիմնադրամի կողմից բացվել է կանանց կրթական կենտրոն։
Ինչպես տեղեկացրին Սևանի համայնքապետարանի աշխատակազմից, ընդամենը երկու ամիս առաջ Սևան համայնքի Զովաբեր բնակավայրում ազդարարվել է «Դէկավվա» հիմնադրամի «Հարեհաս» կրթական ծրագրի մեկնարկը, իսկ երկու ամիս անց «Հարեհաս»-ն իր մուտքն է տոնել Գեղամավան գյուղում:
Բացված կենտրոններում կանայք հնարավորություն ունեն կրթվել, փոխանակվել մտքերով, նախաձեռնություններ սկսել, ընկերանալ և իրար աջակցել տարբեր հարցերում։
«Հարեհաս» ծրագիրը 6 տարվա ռազմավարությամբ զարգացնելու է Գեղարքունիքի մարզի 88 բնակավայր ու կրթելու է 3520 կնոջ։ Ծրագրի արդյունքում ստեղծվելու է 40 կրթական կենտրոն. դրանցից երկուսն արդեն գործում են Սևան համայնքում՝ Զովաբեր և Գեղամավան բնակավայրերում:
Ծրագրի ընթացքում 3520 կին կունենան անվճար կրթության հնարավորություն, այդ թվում՝ «Armenian Code Academy»-ում, իսկ մինչև 60 տոկոսը՝ նաև աշխատանք։
