Գերմանիայի պաշտպանության նախարար Բորիս Պիստորիուսը հինգշաբթի՝ հունիսի 5-ին հայտարարել է Բունդեսվերի ակտիվ զինծառայողների թիվը զգալիորեն ավելացնելու իր մտադրության մասին՝ Ռուսաստանից եկող աճող սպառնալիքի պայմաններում: Նրա խոսքով՝ անհրաժեշտ է մոտ 50,000-ից 60,000 լրացուցիչ զինվոր: Սա նշանակում է գրեթե մեկ երրորդով աճ՝ ներկայիս մոտ 180,000 զինծառայողների թվի համեմատ:
«Հարց է առաջանում, թե արդյոք կամավոր զինվորական ծառայությունը ներկայիս ձևաչափով ապագայում բավարար կմնա», - նշել է Պիստորիուսը՝ Բրյուսելում ՆԱՏՕ-ի պաշտպանության նախարարների հանդիպման ժամանակ: Նա ընդգծել է, որ գերմանական բանակը պետք է պատրաստ լինի ավելի շատ նորակոչիկների հավաքագրման և մարզման:
Բրյուսելում քննարկվում են Հյուսիսատլանտյան դաշինքի պաշտպանունակության լայնածավալ ամրապնդման միջոցառումները: Հատուկ ուշադրություն է դարձվում հակաօդային պաշտպանության համակարգերին:
