Գերմանիայի Դույսբուրգ քաղաքի ոստիկանական բաժանմունքը երկուշաբթի փակել է մի քանի դպրոցներ այն բանից հետո, երբ հաստատություններում սպառնալիքներ պարունակող նամակներ են ստացվել, հայտնել է Die Welt-ը։
Սպառնալի իրավիճակի պատճառով Դույսբուրգի բազմաթիվ աշակերտներ երկուշաբթի չեն կարողացել դպրոց հաճախել։ Գրեթե 18 հազար երեխա տուժել է 15 հանրակրթական եւ երկու միջնակարգ դպրոցներում, ասել է Դյուսելդորֆի շրջանի իշխանությունների ներկայացուցիչը՝ ի պատասխան հարցման։
Ի հետեւանք՝ մի քանի տուժած դպրոցներ երկուշաբթի առավոտյան փակցրել են «Դպրոցը փակ է» ցուցանակներ: Հայտարարվել է, որ փոխարենը կանցկացվի հեռավար ուսուցում։
Ոստիկանության տվյալներով՝ ուրբաթ Gesamtschule-Mitte դպրոցի վարչությունը նամակ է ստացել, որը պարունակում է «սպառնալիքներ եւ աջ ծայրահեղական հայտարարություններ»։ Bild թերթի հաղորդման համաձայն՝ նամակում խոսվում է «զտումների» մասին։ Անհայտ ուղարկողը հաղորդել է երկուշաբթի ուսումնական հաստատությունում նախատեսված քրեական հանցագործությունների մասին։
Ոստիկանությունից հայտնել են, որ կիրակի նույն դպրոցը ստացել է եւս մեկ սպառնալից նամակ, որն ուղարկվել է նաեւ քաղաքի բազմաթիվ այլ դպրոցներ։ «Դույսբուրգի պետական անվտանգության ծառայության փորձագետները, հիմնվելով ներկա իրավիճակի ընդհանուր գնահատման վրա, եզրակացրել են, որ հարձակումների մասին հաղորդագրությունները լուրջ չեն»,- ասել են ոստիկանությունում:
Այնուամենայնիվ, ոստիկանությունը հայտնել է, որ կապահովի տուժած դպրոցներում ոստիկանների հաճախելիությունը՝ «նվազագույնի հասցնելու համար ցանկացած հնարավոր մնացորդային ռիսկ»: Անհայտ հեղինակի եւ սպառնալիքների ծագման հետաքննությունը շարունակվում է։
